YOVI 9 - Embimbiliya - Bíblia Sagrada em Umbundu

¹ Oco Yovi wa kumbulula hati,

² Ci tava. Ndi ci okuti cosi eci ocili. Puãi omunu hẽ, ndãno ondaka yaye yesunga, o yi lombolola ndati ku Suku?

³ Nda umue o yongola oku somba laye, kohulukãi yolondaka viaye omunu ka kumbulula ndaño yimosi.

⁴ Eye wa lunguka vutima, haeye wa piãla kongusu. Helie wa la tamalala laye kuenje wa yula?

⁵ Eye o sondolola olomunda kuenje ka vi ci. O vi tiñulũla eci a kasi lonyeño.

⁶ O sondololavo oluali vocitumãlo caluo. Olongunji vialuo vi luluma.

⁷ O handeleka ekumbi kuenje ka li tundi, lolombungululu o vi yika.

⁸ Lika liaye wa yala ovailu haeye wa endela kakimba okalunga.

⁹ Wa sovola ulala wolombungululu. Wa sovola Pleiade lolombungululu vio ko Sul.

¹⁰ O lingainga ovina vinene ka vi lomboluiwa. Ovikomo viaye ka vi tendiwa.

¹¹ Tala, o mita ombamba kuenje siu moli. O pitahãla puãi siu limbuka.

¹² Tala, o nyeha, kuenje helie u tateka? Helie o popia laye hati, O linga nye?

¹³ Suku vonyeño yaye ka litiulamo. Ndaño oloñuatisi via Rahava wa vi pokuisa.

¹⁴ Oco hẽ, ndu kumbulula ndati? Mõla ndati olondaka vioku u kumbulula?

¹⁵ Ndaño nda pua eko haimo si tẽla oku u kumbulula. Minga ño ohenda ku u wa mindika.

¹⁶ Nda ndo vilikiya kuenje wa ñumbulula, lopo nda sia telele oku kolela okuti wa yeva ondaka yange.

¹⁷ Momo o ñeleketa lofela yehunguhungu, kuenje o luisa ño olombole viange.

¹⁸ Ka tava okuti fuima, puãi o ñutisa eci ci lula.

¹⁹ Nda ondaka yolohõlo, Tõlo yu! Nda ondaka yesunga vekanga, helie u tukula oku linga onganji?

²⁰ Ndaño si kuete ongole haimo omẽla wange nda wa misa. Ndaño nda pua eko haimo eye nda wa sokiyila eko.

²¹ Nda pua eko. Si simi siti, Ndi cimue. Nda nyehula omuenyo wange.

²² Ka ci lingi cimue,— oco ndinga siti, Eye o nyõla vosi, lava va pua eko, lava vakuevĩho.

²³ Eci ohali yi nena okufa ocipikipiki eye o fuanguila ohali yava va pua eko.

²⁴ Oluali lua eciwa peka lia vakuevĩho. Eye o vuvika ovipala violonganji vialuo. Nda heyeko nda helie?

²⁵ Oloneke viange vi enda lonjanga, onjanga yukuakulupuka yi sule. Vi tila, ka vi mõli esumulũho.

²⁶ Vi pita ndawato oloneva, pamue ndongonga yi solohela ohute yayo.

²⁷ Nda ndinga siti, Njivala okulisiõsiõla kuange. Okunyumãla kuocipala cange ku pua. Nolisako.—

²⁸ Oco ñala lohele yolongembia viange, omo ndi ci okuti ku njovola.

²⁹ Misiwa, oco ndi likolisilila nye olivova?

³⁰ Nda ndi lisukula lovava o neve loku pusa ovaka lovava undiungu

³¹ haimo o njimba vokueve kuenje uwalo wange muẽle u suvuka.

³² Momo eye hamunuko ndame okuti ndu kumbulula, kuenje tu ñualẽhẽla vekanga.

³³ Pokati ketu ka pali onepisi yi tu kapa ovaka ayo, kavali ketu.

³⁴ A njupe ombueti yaye. Ocinjoko coku u yokokela ka ci ka ñuate vali.

³⁵ Omo, nda oco nda nda popia, oku u kuatela vali usumba lakamue. Momo si kasi leko ndeci eye a simila.