YOVI 8 - Embimbiliya - Bíblia Sagrada em Umbundu

¹ Oco Bilidade u Siuhi wa kumbulula hati,

² Olombangulo viove evi vimuha eteke lipi? Eteke lipi o liweka oku popia ño ofela?

³ Suku hẽ o tetulula lesanda? Tõlo hẽ o pengisa esunga?

⁴ Nda omãla vove vo lingila akandu, eye nda wa va eca kunene wakandu avo.

⁵ Nda ove o sanda Suku loku likutilila ku Tõlo,

⁶ nda ove we lipua loku sunguluka eye o lisenga oku ku kuatisa kuenje o ku sokiyila oku kala ndeci ca ku sesamela,

⁷ okuti ndaño eci wa kaile laco kefetikilo ci kala ci sule, omo eci o kala laco kesulilo ci piãla vali enene.

⁸ Hu pinga siti, Pula vakuasiãhũlu. Sokolola ovina olosekulu vietu via limbuka.

⁹ Momo etu tuakuahẽla lia pita, kuenje lacimue tua kũliha. Oloneke vietu kilu lieve via linga ndundembo.

¹⁰ Vakuasiãhulu hẽ havoko va tẽla oku ku longisa loku ku lungula loku ku kuatisa lolondunge viavo?

¹¹ Onõle hẽ yi tunda nda havocisaveko? Ocisapa hẽ ci tundila apa ka pali ovava?

¹² Osimbu ci talala kuenje ka ca tetiwile handi oco ci uvuka. Ovikũla viosi vikuavo vi siala konyima oku uvuka.

¹³ Haico esulilo lia vosi va ivala Suku. Elavoko liu ka tavele ku Suku li nyõlẽha.

¹⁴ Eci a kolela ci nyanyoha. Ekolelo liaye li linga nduwavi wociwavi.

¹⁵ O liyeka konjo yaye puãi ka yi tai, o yi kuatelela puãi ka ya kolele.

¹⁶ Eci utanya u tua eye o kula ciwa; kuenje ovisapa viaye vi yanda vocumbo caye.

¹⁷ Olombombo viaye vi yandela kono. O kuatelela kovawe.

¹⁸ Nda o nyõlẽhẽla vocitumãlo caye, cu likala citi, Sia la ku mõla.

¹⁹ Tala, eli olio esulilo liomuenyo waye, kuenje posi opo pa tunda vakuavo vo piñala.

²⁰ Tala, Suku ka inasi omunu wa sunguluka, pamue oku kuatisa vakuakulinga cĩvi.

²¹ Noke o yukisa omẽla wove ovinjola, kuenje o ku imbisa ovisungo vionjolela.

²² Ava va ku suvuka va kutisua osõi, kuenje onjo ya vakuevĩho ka yi kalako vali.