YOVI 7 - Embimbiliya - Bíblia Sagrada em Umbundu

¹ Kilu lieve omunu hẽ ka kuete upange wa kãla? Oloneke viaye hẽ ka via sokele loloneke viupange wutolongo?

² Ndeci upika a livela ulembo, pamue u o kasi kupange wutolongo a talamela ofeto yaye,

³ haico ñasi ame. Onepa yange olosai via pua elavoko. Ovoteke olongembia, ovo ange.

⁴ Eci mekela ndinga siti, Otembo yipi masuka? Puãi uteke wa lua, kuenje ndi tingoloka ño pula toke koku ca.

⁵ Etimba liange lia wala ovanyo leliño. Apute ange a linga olombande puãi noke a tuñuluha.

⁶ Oloneke viange vi pita pita lonjanga, ombundo yutele yi sule, kuenje vi pua, elavoko lakamue.

⁷ Ivaluki okuti omuenyo wange wa soka ndofela. Ovaso ange ka a moli vali esumũlũho.

⁸ Ovaso u o ndete ka a moli vali. Osimbu o mbanja nakata.

⁹ Ndeci elende li pita kuenje li enda haico u o lokila vonjembo ka tundimo vali.

¹⁰ Keya vali konjo yaye, Ocitumãlo caye ka cu kũlĩha vali.

¹¹ Oco si kandangiya omẽla wange. Omo omuenyo wange wa tokotelua oco mopia. Omo vutima wange mua suvala oco ndi lisiõsiõla.

¹² Ame nga ndi Kalunga, pamue ndi Canjangombe, okuti wa ñapa ondavululi?

¹³ Eci ndinga siti, Ula wange u ndemba, ohama yange yi imũla oku lisiõsiõla kuange,

¹⁴ oco o njokokisa lolonjoi, kuenje o ndingisa usumba lawima.

¹⁵ Okuti nda nda nola oku lekiwa ekõle kuenda okufa, akepa a ange havoko.

¹⁶ Nyehula omuenyo wange. Si yongola oku kala ño lomuenyo. Nunde, omo oloneke viange ofela.

¹⁷ Omunu hẽ nye okuti o sakalala ño-o laye, kuenda u sokoloala

¹⁸ loku u yambula olomele viosi kuenda oku u seteka ndopo la ndopo?

¹⁹ Eteke lipi o liweka oku sakalaisa? Eteke lipi o nyiha otembo yoku ina ovate?

²⁰ Okuakulavulula omanu, ame, nda ndinga ekandu, ove, cu ku linga nye? Ame nda lingila nye ocimãho cove? Ceya ndati okuti kokuove nda linga ocilemo?

²¹ Nye ku ngecelela akandu ange loku imula evĩho liange? Momo cilo mekela vonjembo. O sandiliya puãi si kalako.