YOVI 6 - Embimbiliya - Bíblia Sagrada em Umbundu

¹ Oco Yovi wa kumbulula hati,

² A mai we! Nda ca tavele oku pesalisa ohali yange! Nda ca tavele oku kapa otokua yange vombalãsa!

³ Momo nda oco nda ca kala okuti ohali yange yi lema, eseke liosi liokalunga li sule. Oco olondaka viange via linga viumãmõhe.

⁴ Momo ovisongo via Tõlo vi kasi vokati kange. Utima wange u nyua owule wavio. Ayokokiso a Suku a ngendela.

⁵ Ocimbulu covusenge hẽ ci koma nda ci kasi lowangu? Longombe hẽ yi koma nda yi kasi lokulia kuayo?

⁶ Eci cesase hẽ ci liwa nda ka ca singiwile omongua? Ondunga yi yela yesaila nga yi pepa?

⁷ Utima wange ko tava oku vi lamba. Via ndingila ndokulia ku koka onyanya.

⁸ A mai we! Nda ca tavele okuti epingilo liange li taviwa! Nda ca tavele okuti Suku o ndingila ndomo nda livela!

⁹ Nda Suku wa tava oku ñeleketa, nda wa tava oku olola eka liaye loku nyõla,

¹⁰ nda nda lembelekiwa. Ndaño olongembia via piãla nda nda vi sanjukila. Momo sia likalele olondaka vi U o kola.

¹¹ Olohõlo viange he ovio nye okuti nalamẽla? Esulilo liange hẽ olio nye okuti ñala lepandi?

¹² Olohõlo viange hẽ olohõlo viovawe? Etimba liange hẽ liosipi?

¹³ Ocili vokati kange ka muli eci ci ñuatisa. Cosi ca ñuatisile ale ca njupiwa.

¹⁴ U wa likala oku linga ekamba liaye ohenda wa liweka oku sumbila Tõlo.

¹⁵ Vakuetu va liaña ndolusipa luovava pamue ndandunde a pita lonjanga,

¹⁶ hao a pongoloka locikokoto okuti oneve yi wundamo.

¹⁷ Nda kuiya owuya vi takata. Eci kuli owuya vi sengeteta vonjila via pita.

¹⁸ Ovando va yapuka vonjila yavo. Va yapukila vekalasoko kuenje va taka.

¹⁹ Ovando a Tema va sanda ovava, lovando a Seva va kuata elavoko.

²⁰ Va sumua omo va kaile lelavoko. Veya kuenje va sakalaisua.

²¹ Cilo ene wa ndingi ndandunde aco. Vu mola ohali yange kuenje vu kasi lusumba.

²² Yimue onjanja hẽ nda popia lene siti, Nyihi ombanjaile? Pamue siti, Kukuasi wene ngeceli ocitukiko?

²³ Pamue siti, Mopeli peka liunyali? Pamue siti, Njovoli peka lioloñangisi?

²⁴ Ndongisi kuenje nguha. Ndomboluili ndeci nda lueya.

²⁵ Olondaka via sunguluka vi kuete ongusu yalua, puãi okulemẽla kuene ku lemẽla nye?

²⁶ Wa simi okuti ci tava oku lemẽla olondaka osimbu olondaka viomunu wa suvala via soka ño ndofela?

²⁷ Ene, ndaño oku tela olosiwe ocela nda vu ci tẽla, pamue oku hoyela ondando yekamba.

²⁸ Kaliye, ndingi ohenda oku njimba ovaso, momo siu kembi.

²⁹ Ndo pingi siti, Tiuki. Cimue cĩvi ka ci ka lingiwe. Tiuki, omo njongola oku yovoka londaka yange.

³⁰ Vomẽla wange hẽ mu tunda eviho? Olondunge viange nga ka vi limbuka ũvi?