YOVI 5 - Embimbiliya - Bíblia Sagrada em Umbundu

¹ Kaliye vilikiya! Kuli nga umue o ku kumbulula? Wenda kulie pokati kava va kola?

² Ocinyuañi ci nyõla u wa kamba olondunge, lu o tamalala la Suku o fa.

³ Nda mõla eveke lia hindingila, puãi ocipikipiki onjo yaye ya lianguiwa.

⁴ Omãla vaye ka va kolelepo, va pisiwa lesanda valusenje kuenje u o va popela ka kuli.

⁵ Vakuanjala va lia eci a lombola. Ndaño pokati kolosongo o seteka oku lima, kuenje vakuenyona va nyua asenjele aye.

⁶ Momo ohali ka yi tundi koneketela, ndaño otokua kongongo.

⁷ Puãi omunu o citiwila ohali ndeci olosase vi enda kilu.

⁸ Puãi ame, ame sandiliya Suku, kuenje kovina viosi viomuenyo wange ñolela Suku.

⁹ Eye o lingainga ovina vinene ka vi moñoluiwa. Ovikomo a lingainga ka vi tendiwa;

¹⁰ Haiye o lokisila ongongo ombela loku leñelisa ovapia lovava aco.

¹¹ O kemalisa ambombe kuenje o yulisa vakualukonyo.

¹² O tangelekisa ongombo ya vakuatutu, okuti ovaka avo ka a tẽla cimue.

¹³ O pisa vakualondunge latutu avo muẽle. Ahãla a vakuakuliaña a nyoleha lombili.

¹⁴ Ndaño utanya kokuavo wa linga ño owelema. Kutanya va papata nduteke.

¹⁵ Puãi eye o popela olosiwe komela wavo, kuenda olosuke peka lia vakuonene.

¹⁶ Oco olosuke vi kuete elavoko, kuenje vakuevĩho va muniha olomela

¹⁷ Tala, omunu Suku a lemẽla eye wa sumulũha, oco ku ka pembule epokuiso lia Tõlo.

¹⁸ Momo eye asa olongase puãi haiye o vi kuta. Eye o tota ombole puãi ovaka aye a sakula.

¹⁹ Eye o ku popela kolohali epandu, ndaño epanduvali lacimue cĩvi ci ku lamba.

²⁰ Pokati konjala eye o ku yovola kokufa. Pokati kovita o ku popela kunene wosipata.

²¹ Ove o vindikiyiwa kelimi li tatula. Ku yokokela enyolẽho eci liya.

²² O siluila enyõleho lonjala eci viya. Ndaño ovinyama viokilu lieve ku vi kuatela usumba.

²³ Momo o linala lovawe ovusenge. Lovinyama viovusenge vi ku ombokela.

²⁴ Kuenje o kũlĩha okuti onjo yove ya koka. Onyula ocunda cove kuenje ku kambi cimue.

²⁵ O kũlĩhavo okuti ombuto yove yi lua. Lomãla vove va lua ndowangu wokilu lieve.

²⁶ O pitila tupu keyambo liove vukongo, o pitila ndeci ocitungu cotiliku ci pitila kocimbandi.

²⁷ Eci oco tua kũlĩhĩsa, kuenje ci kasi muẽle ocili. Ci yeva, ci lilimbukila.