YOVI 42 - Embimbiliya - Bíblia Sagrada em Umbundu

¹ Oco Yovi wa kumbulula Yehova hati,

² Ndi ci okuti o tẽla cosi kuenje lacimue ocipango cove ci tatekiwa.

³ Ove elie okuti o sitika alungulo, lolondaka ka vi kuete ukũlĩhĩso? Ndi litavela okuti nda popia ovina ka via ndombolokele, haivio ovina via mitahãla, sia vi kulĩhile muẽle.

⁴ Njevelele kuenje mopia. Cilo ame hu pula, love o ñumbulula.

⁵ Oku ku yeva letuĩ nda ku yeva yeva, cilo puãi iso liange lia ku mõla,

⁶ kuenje nda linga ocipelekese caño. Ndi litavela kuenje ndi livela oku tumãla voneketela lovetiko.

⁷ Eci Yehova a mala oku popia olondaka evi la Yovi oco Yehova wa popia la Elifasi u Temani, hati, Onyeño yange ya ku wengukila ove, lakamba vove vavali, momo ka wa mopeleli eci cocili ndeci ca linga ukuenje wange Yovi.

⁸ Oco kaliye, nyañuli olonui epanduvali lovitupi violomeme epanduvali. Kuendi lavio kukuenje wange Yovi, ka vi lumbi ndocilumba cene coku pia elisi. Kovaso yaco ukuenje wange Yovi o vu likutilila, momo ndu yeva eci o likutilila hati, A Suku, ku ka linge lavo eci ca soka luveke wavo; momo ka wa mopeleli eci cocili ndeci ca linga ukuenje wange Yovi.

⁹ Oco Elifasi u Temani, kuenda Bilidade u Siuhi, la Cofare u Namati va enda, va ka lingile ndeci Yehova a va sapuila; kuenje Yehova wa yeva ohutililo ya Yovi.

¹⁰ Eci Yovi a mala oku likutililila akamba vaye oco Yehova wa tumbulula vali esumulũho liaye kuenje Yehova wa ihã Yovi ca soka olonjanja vivali leci a kaile ale laco.

¹¹ Oco vahuvaye vosi kuenda vamukãi vaye vosi la vosi vo kũlĩhĩle ale veya kokuaye. Va lila pamuamue ombolo vonjo yaye. Vo kolisa loku u lembelekela ohali yosi Yehova o muisa. Vosi vo wĩha olombanjaile, omunu otupalata tumue, omunu otupalata tumue, kuenda omunu onẽla yulu, omunu onẽla yulu.

¹² Oco Yehova wa sumũluĩsa calua esulilo lia Yovi okuti efetikilo liaye ci sule, yu wa kala lekũi liolohũlũkai kolohũlũkai vikuãla kolomeme, kuenda olohũlũkãi epandu kolongamelo, kuenda ohulũkãi kolokanga violongombe, kuenda ohulũkãi kolomange viovimbulu.

¹³ Wa kalavo lomãla valume epanduvali kuenda omãla vakãi vatatu.

¹⁴ Wa luka ukulu waco hati, Yemima, wavali hati, Kesiya, watatu hati, Keren-hapuki.

¹⁵ Vofeka yosi ka mua sangelue akãi vakuavo va posoka ndomãla va Yovi akãi; yu isiavo wa va ĩha ocipiñalo kumue lavamume vavo.

¹⁶ Kovaso yaco Yovi wa kala lomuenyo ocita kanyamo kanyamo akuĩ akuãla, yu wa mõla omãla vaye kuenda omãla vomãla vaye, okuti ovitumbulukila vikuãla.

¹⁷ Oco Yovi wa fa, wa fa tupu ekongo ukualoneke vialua.