YOVI 41 - Embimbiliya - Bíblia Sagrada em Umbundu

¹ Canjangombe hẽ, ci tava oku u pipa lonjolo? pamue oku kueka elimi liaye lukolo?

² Ci tava oku kapa ukolo venyũlu liaye, pamue oku tombola olumbanjo luaye utomo?

³ O tava hẽ, oku likutilila kokuove? Opopia love lokahekemba?

⁴ O tava oku litumbika kokuove okuti o linga ukuenje wove otembo ka yi pui?

⁵ Ove hẽ, o papala laye ndeci omunu a papala lonjila? U kuta lukolo oku sanjuisa afeko vove?

⁶ Ukuakufũla hẽ va hoyela ondando yaye? Vo tepela pokati kafũli?

⁷ O tẽla oku yukisa etimba liaye lovisongo vi kuete ovatui, pamue utue waye lolonjelia vioku pipa?

⁸ Seteka oku u kuata leka! Sokolola ocilunga caco! Lalimue eteke o ci linga vali.

⁹ Tala, elavoko liosi lioku u kuata li linga liesanda. Tuli omunu u mõla o liwekapo.

¹⁰ Lomue o kasi lutõi woku u tuñunya. Oco hẽ, ame, ka ci piãla vali enene? Helie o talama kovaso ange?

¹¹ Wa la nyiha cimue helie, okuti ñuete laye ofuka? Cosi ci kasi vemehi lilu cange ale.

¹² Siuhĩla ovolu aye, pamue olohõlo viaye via piãla pamue etimba liaye lia pama.

¹³ Elie wa la lula uwalo wa Canjangombe? Elie wa la upa ocikutu caye covivela?

¹⁴ Elie o tẽla oku yulula apito ocipala caye? Ovayo aye e yuka eci ci yokokisa.

¹⁵ Koñoño yaye kue yuka ovilala viakaka. Lakaka aco a likuata ngo huti ño va a valela,

¹⁶ hao a litokeka okuti ofela ka yi piti pokati kao.

¹⁷ A likakatela muẽle. A lilamẽlẽla okuti oku a tepa ka ci tava.

¹⁸ Olohesi viaye vi nyelula ocinyi. Ovaso aye a linga ndovisokopia viomẽle.

¹⁹ Vomẽla yaye mu tunda ovimĩhi, lolosase viondalu vi tẽha tẽha.

²⁰ Venyũlu liaye mu tunda ombundu ndeci yi tunda vombia yi feluka, mu tundavo owisi wa soka lowisi u tunda koloneva vi taima.

²¹ Efuimo liaye li pepelela akãla ondalu. Ulienge u tunda vomẽla yaye.

²² Kosingo yaye kuli ongusu. Oviendalomuenyo viosi viu yokokela.

²³ Ovanya ositu yaye a livinda. Okakatela, ka a lisengi.

²⁴ Utima waye wa kola ndewe, wa kola muẽle ngõ ndombambo yoku sula.

²⁵ Eci a katuka olonõi vi kuata usumba. Eci oku lisenga kuaye ku yevala vi linga ayui.

²⁶ Ndaño osipata yu toma ka yu lingi cimue. Ndaño onjelia, ndaño unga, ndaño osevo.

²⁷ Kokuaye utale wa soka ndowangu wa kukuta losipi nduti wa sekiwa.

²⁸ Usongo ka u tẽla oku u lupuisa, lovawe epipili o lingila ndovinene.

²⁹ Kokuaye ovipopolo via linga ño ndo vinene. Oyola oku yuela kuovonga.

³⁰ Kimo liaye kua linga ndoviyo via tua. Oliyala vonata ndomakina yoku sasa.

³¹ O feluisa olui ndombia. O venja venja vokalunga ndomo va venja venja vombia yonguendu.

³² Konyima yaye ku kuama onjila yi nina, huti ño olui lu kuete owele.

³³ Kilu lieve ka kuli ukuavo wa lisoka laye, okuti ocendalomuenyo ca pua usumba ndeye.

³⁴ Oviendalomuenyo via velapo viu kuetele usumba. Eye soma yomãla vosi vepela.