YOVI 40 - Embimbiliya - Bíblia Sagrada em Umbundu

¹ Yehova wa kumbulula Yovi hati,

² Ukuakuvetisa vakuavo evelo hẽ, o tamalala la Suku? U o hoyahoya la Suku a ci kumbulule.

³ Oco Yovi wa kumbulula Yehova hati,

⁴ Tala, ame ndimunu waño. Hu kumbulu la nye? Ñapa eka liange komẽla wange.

⁵ Nda popia lumosi puãi si popi vali, luvali, puãi si amisako vali.

⁶ Oco Yehova wa kumbuluila Yovi vocipepe, hati,

⁷ Iña pimo ndulume. Kolisako! Ame hu pula love o ñumbulula.

⁸ Ove hẽ, o tatãla esunga liange? O misa ame okuti oco ove o yovoke?

⁹ O kasi lokuokuo kua lisoka lokuokuo kua Suku? Ondaka yove hẽ, yi tẽla oku lemĩla ndondaka yange?

¹⁰ Linga yapa. Liposuisa luwale kuenda ekemalo. Wala unene lulamba.

¹¹ Onyeño yove yi supoke. Vanja komunu wosi o lituna, u ketisa.

¹² Vanja muẽle komunu wosi o lituna, u ketisa. Vakuevĩho va kosela kuosi va kasi.

¹³ Va lembikila kumuamue voneketela, ovipala viavo vi kutila pamosi veyambo.

¹⁴ Ovina evi nda o vi linga oco hu sivaya. Nava okuti okuokuo kuove muẽle kuondio ku tẽla oku ku popela.

¹⁵ Sokolola ongeve. Nda yi lulika ndeci nda ku lulika ove. Yi lia lia owangu ndongombe.

¹⁶ Sokolola ongusu yi kasi kombunda yayo, lolohõlo vi kasi volonumba vietimba liayo.

¹⁷ Yi talakisa ucĩla wayo ndocinendele. Asipa ovikalo viayo a livinda.

¹⁸ Akepa ayo a soka lalove osipi. Lovolu ayo a soka lawisi utale.

¹⁹ Kunene oyo tete kovopange a Suku. U wa yi lulika a yamele eye losipata!

²⁰ Kakulo olondui kuna kuiyaiya ovinyama viosi viovusenge oku ku tunda okulia kuayo.

²¹ Yi pekaila vemi liovipindiangolo, lovetete liolonẽva lovocisave.

²² Ovipindiangolo vi yi sikĩlĩla ulembo wavio. Atamba ovolui a yi ñuala.

²³ Ndaño olui lue yuka enene ka yi kuete usumba. Yi kala lutõi ndaño olusipa lua Yordão lu samohaila komela wayo.

²⁴ Oku yi pipa lonjolo hẽ, ci tava? Omunu he, o tela oku kapa ocinunga venyulu liayo?