YOVI 4 - Embimbiliya - Bíblia Sagrada em Umbundu

¹ Oco Elifasi u Temani wa kumbulula hati,

² Nda umue o seteka oku vangula love hẽ ci ku puiya? Puãi helie o tẽla oku likandangiya oku popia?

³ Tala, ove muẽle wa lungola valua, haive wa kolaisa ovaka a yonga.

⁴ Olondaka viove via kolaisa u wa soka oku kupuka, haive wa kolaisa olongolo via pekengua.

⁵ Puãi kaliye ceya kokuove kuenje ca ku kokela ocinyuañi. Ci ku kuete kuenje ca ku yokokisa.

⁶ Ekolelo liove hẽ ka li tundi kesumbilo liove lioku sumbila Yehova? Elavoko liove hẽ ka liyilila koku suñama kuolonjila viove?

⁷ Oco, sokolola ciwa. Eteke lipi wa muile umue ka kuete eko wa takata? Kupi wa muile vakuesunga va nyolẽha?

⁸ Eci ame nda mõla mõla, ceci, Ava va lima evĩho loku imba ombuto yohali, evĩho lohali ovio va lombola.

⁹ Va nyõlĩwa lefuimo lia Suku. Va liwa lofela yonyeño yaye.

¹⁰ Ohosi ya tema, ohosi yi kumba kumba. Ovayo ayove olohosi a teka teka.

¹¹ Ohosi ya pama yi fa lonjala omo ka ya kuatele cokulia. Lomãla vomange yohosi va sandoka.

¹² Va noñuinya ondaka. Etui liange lia yeva okuloñuinya kuaco.

¹³ Pokati kanguengue olonjoi viuteke, osimbu omanu va pekela otulo,

¹⁴ oco ocinjoko ca ñuata kuenje nda luluma. Ca lulumisa akepa ange osi.

¹⁵ Oco ofela ya pita kocipala cange kuenje oluvei luetimba liange lua yakalala.

¹⁶ Ya talama puãi sia limbukile ocili. Ca kala ño cimue kovaso ange, kuenje tete coha ño. Noke nda yeva ondaka, yiti,

¹⁷ Omunu o fa hẽ, o tẽla oku linga ukuesunga kovaso a Suku? Omunu hẽ o tẽla oku yela kovaso usovoli waye?

¹⁸ Suku ka kolela ndaño akuenje vaye, ndaño ovangelo vaye o va vetela evelo.

¹⁹ Nda oco ka ci piãla hẽ lava va tunga volonjo vieve? Oviseveto viavo vi kasi voneketela, haivo va keleñaliwa nda numbakaliyoke.

²⁰ Pokati komele loñolosi va nyõleha. Va taka olumue kuenje lomue o ci limbuka.

²¹ Ekemalo liavo nga ka lia va nyehiwile? Va fa puãi hamomoko olondunge viavo ovio vialua.