YOVI 39 - Embimbiliya - Bíblia Sagrada em Umbundu

¹ Ove hẽ, wa kuliha uvo wokucita kuolohõha violomunda? O kala lonusi eci yi cita?

² O tẽla oku tenda olosãi viavio? Wa kuliha eteke vi laika oku cita,

³ eci vi petama oku cita kuenje vi kutulula omãla vavio?

⁴ Omãla vavio va kuata ongusu, va kulila vusenge, va tunda, kuenje ka va tiuka vali kokuavio.

⁵ Elie wa eca ocimbulu covusenge? Elie wa kutulula ovikõlo viocimbulu ci yoloaka,

⁶ cina nda kapa vekalasoko kuenje nda ciha ofeka yomongua ndocitumãlo caco?

⁷ Ci yola onjuela yovimbo, kuenje ka ci yevi okukaluka kukuakuendisa.

⁸ Ci ñuala ñuala kolomunda oku sanda okulia. Ci vanjiliya ovina viosi vi talala.

⁹ Onyani he yi tava oku ku vumba? Yi tava oku lala vocimanga cove?

¹⁰ Onyani hẽ o tẽla oku yi kutila kosialuwa lovikolo? Yi ku kuatisa oku lima ovapia?

¹¹ Ove hẽ, o yi kolela omo olohõlo viayo via lua? Weca kokuayo upange wove?

¹² O yi kolela okuti yi tiuka, loku nena olomema pocimbandi cove?

¹³ Ombo yi vakula avava ayo lepela. Avava ayo lovonya ayo puãi a kuete ocisola?

¹⁴ Momo yi sia asaila ayo posi, yi tava okuti a kolela owuya weseke.

¹⁵ Yivala okuti omai yi tẽla oku a keleketa. Yivalavo okuti ocinyama covusenge ci tẽla oku a nyanyola.

¹⁶ Yi tata otumãla tuayo lungangala, huti ño hatuayoko. Ndaño kokuimbila kuayo ka ku tundi omala, kokuayo kacimueko.

¹⁷ Momo Suku wa yi pumbisa olondunge, ka yihĩle onepa yukulihiso.

¹⁸ Eci yi katuka oku tila, yi yola okavalu lu endelako.

¹⁹ Ove he, wa ĩha okavalu olohõlo viako? Ove hẽ, wa kapa ongusu kosingo yako?

²⁰ Ove hẽ, wa ka tombokaisa ndocimbonde coluhuma? Okufembula kuako kuepela ku linga usumba.

²¹ Ka likalaila vetapi, kuenje ka yolela ongusu yako. Ka yolokela kocilunga.

²² Ka ka kuata usumba, ka ka yokoka. Ka ka tila osipata.

²³ Ekolombele li ka veta veta, puaka, puaka. Haico onjelia yi nina kuenda unga.

²⁴ Ka fulumula posi loku tema kuenda onyeño, Ka ka tẽla oku talama eci ka yeva olumbeta.

²⁵ Eci olumbeta lu sika, ka tava, hati, Ewa! Ka yevela kupãla elemba liocilunga kuenda ondaka ya vakesongo lokuvilikiya kuaco.

²⁶ Ongonga hẽ, yi tandavasaila avava ayo ko Sul, loku palãlela kupala lolondunge viove?

²⁷ Ongonga yulombo yi londa locihandeleko cove, loku tunga ocanju cayo kilu?

²⁸ Yi tunga ocanju cayo kilu liovawe yi wila wila kolondungu viao.

²⁹ Oko yi lavuluila ohuta yayo, ovaso ayo a yi muila kupãla.

³⁰ Ovivuvu viaco vi sipa osonde, oko ku kuete ovifẽ oko yi kala.