YOVI 38 - Embimbiliya - Bíblia Sagrada em Umbundu

¹ Kuenje Yehova wa kumbuluila Yovi vocipepe, hati,

² Ove elie okuti o sitika alungulo ange lolondaka ka vi kuete ukũlĩhiso?

³ Iña pimo ndulume. Kolisako. Cilo ame hu pula, love o ñumbulula.

⁴ Eci nda seveta oluali ove wa kala pi? Nda ukualondunge sapuileko.

⁵ Elie wa lu valeka? Siti wa ci kũliha. Elie wa lu seteka lukolo?

⁶ Ociseveto caluo va ci sevetela pi? Elie wa tumbika ewe liaco lievindi,

⁷ eci olombungululu viomẽle via imbila pamosi, lomãla vosi va Suku voluila onjolela?

⁸ Elie wa kapa apito okalunga, eci ka sovuiwa ndoku tunda vimo?—

⁹ leci nda ka kapa alende nduwalo wako, lowelema ndonanga yako yoku iña?—

¹⁰ leci nda ka tukuila olongave loku ka kapa ovikundiko lapito,—

¹¹ leci nda ka handeleka siti, Wiya toke palo, ku ka pitahãle. Akimba ove a sole oku lituna a sulila palo.

¹² Tunde oloneke viove via fetika wa la pañinya omẽle? Wa la lekisa ongula ocitumãlo cayo

¹³ okuti yi kuata kavindi oluali kuenje yi tutumulamo vakuevĩho?

¹⁴ Oluali lu pongoloka ndotuma tua taliwa, kuenje lu kapiwa avala ndonanga.

¹⁵ Ocinyi cavakuevĩho copiwa, lokuokuo kuavo kua tulikua ku teka.

¹⁶ Ove hẽ wa la pitila kolono viokalunga? Wa ñuala ñuala volohondo vielondo?

¹⁷ Olombundi viokufa hẽ limue eteke via ku lekisiwa? Olombundi viowelema wokufa hẽ wa la vi mõla?

¹⁸ Okutanda kuoluali hẽ kua ku lomboloka? Eci cosi nda ca ku lomboloka sapuileko.

¹⁹ Onjila yenda konjo yocinyi yi kasi pi? Konjo yowelema ku pi?

²⁰ Nda wa yi kuliha songuila ocinyi kofeka yaco. Nda konjo yowelema wa kũlĩhako wila vonjila.

²¹ Olonjila viaco wa vi kũlĩha momo wa citiwa ale! Oloneke viove via lua!

²² Ove hẽ wa la iñila vatambo oneve? Wa la mõla oviseleko viociwe

²³ cina nda selekela eteke liohali okuti eteke liocilunga lovita?

²⁴ Onjila yoku ku tunda ocinyi yi kasi pi? pamue onjila yoku ku tunda ofela yokutundilo oku enda koluali luosi?

²⁵ Elie wa fẽlẽla endunde onjila yalio pamue oku sovola onjila yociliakulo condindimo,

²⁶ okuti ombela yi loka vekalasoko, lovekango omo ka muli omanu,

²⁷ oku li kutisa kuenje yimisa vali osi ya kukutile loku yovisa vali owangu?

²⁸ Ombela hẽ yi kasi la isiayo? Elie wa cita atosi olume?

²⁹ Ocivava ca tunda vimo lielie? Elie wa cita ocikokoto?

³⁰ Ovava a likuata ndovawe. Kilu liolondui loviva ku likuata ngo.

³¹ Ove hẽ, o tẽla oku kuta olombungululu via Pleiade O tẽla oku kutulula ovikolo vi Ukongolombua?

³² O tẽla oku sokiya Masaroti kuvo waye? O tẽla oku sokiya Ursu lomãla vaye?

³³ Ove hẽ, wa kuliha ovihandeleko viokilu? O tẽla oku vialisa olohoka vialio kilu lieve?

³⁴ O tẽla oku vilikiya alende okuti ovava alua a ku tuvika?

³⁵ O tẽla oku tumila oviliakulo okuti vi popia love viti, Etu valo, kuenje vi enda?

³⁶ Elie wa longisa alende? Elie wa pindisa olombungululu?

³⁷ Elie o kuete olondunge vioku pokuisa alende? Helie o tẽla oku vongola olombenje viokilu,

³⁸ okuti eve li linga onata kuenje avunge a likuata?

³⁹ Ove hẽ, o tẽla oku yevela ohosi ohuta yayo, pamue oku kutisa ayove olohosi,

⁴⁰ eci a pekela valeva avo pamue oku lavuluila avungu avo?

⁴¹ Elie o sandela ocikuamanga okulia eci omãla vaco va vilikiya Suku, kuenje va ñuala ñuala omo va kamba okulia?