YOVI 37 - Embimbiliya - Bíblia Sagrada em Umbundu

¹ Eci lacovo ci lulumisa utima wange kuenje u tunda vomangu yawo.

² Yevelela kokulemila kuondaka ya Suku, pamue kokundunduma ku tunda komela waye.

³ Eye o yevisa okulemila kuaco muosi vemehi lilu. Otuma ociliakulo caye kavindi osi oluali.

⁴ Kovaso yociliakulo ku yevala okulemila kuaye. Olemĩla lomoko yuwale waye. Ka tutuiya ombela eci okulemila kuaye ku yevala.

⁵ Okulemila kuondaka ya Suku ku komohĩsa. Olingainga ovina vinene ka via tu lombolokele.

⁶ Momo o popia lo neve hati, Lokila kilu lieve. Haico a popia lokalupe kuenda ombela hati, Kolisiko.

⁷ O talamisa ovaka omanu kupange okuti vosi va limbuka unene waye,

⁸ ndaño ovinyama vi vunda vovisuku, pamue vi kala pavungu avio.

⁹ Ehunguhungu li tunda ko Sul lombambi yi tunda ko Norte.

¹⁰ Ocikokoto ci tunda kefuimo lia Suku, ndaño oviva lolondui vi pongoloka ocikokoto.

¹¹ Eye o yukisa alende lombela. Kalende ku tunda oviliakulo viaye.

¹² Eye o vi tuma oku ñuala ñuala kuosi kua tunga omanu, okuti vi linga cosi a vi tumĩla.

¹³ O ci lingila pamue eyambulo pamue osi yaye, pamue ocisola caye.

¹⁴ A Yovi, yevelela eci mopia. Talama, sokolola ovikomo via Suku.

¹⁵ Ove hẽ, ndomo Suku a linga upange waye mua ku lomboloka? Ndomo a tuisila ociliakulo covelende liaye mua ku lomboloka?

¹⁶ Okunyopamisua kualende hẽ kua ku lomboloka? Ovopange anene u wa loñoloha kukulĩhĩso hẽ ove wa a kũliha?

¹⁷ Eci ko Sul ku tunda ofela ya soka ndondalu kuenje uwalo wove u tokota, loluali luosi lũha,— ca ku lomboloka ale?

¹⁸ Ove hẽ, o tẽla ndeye oku yala ilu ndomo lia likuata ngo loku lisoka ndolumuilo lutale?

¹⁹ Tu longise eci tu popia laye. Etu muẽle oku pongiya eci tu popia ka tu ci tẽla omo tuakuanumbi.

²⁰ Cu sapuilua hẽ okuti njongola oku vangula laye? Olonjanja vimue hẽ, omunu ka liveli oku iniwa?

²¹ Nda ofela ya sika kuenje ya sandula alende, omanu ka va tẽla oku vanja kekumbi ndomo lia tua vilu.

²² Ko Norte ku tunda ulamba u nina ndulu. Suku wa ñualiwa luwale u linga usumba.

²³ Oku kũlĩha Suku Tõlo ka tu ci tẽla, omo unene waye wa tu pitahãla, ndaño esunga liaye. Ka tava oku pengisa esunga locili.

²⁴ Oco omanu vo sumbila. Eye ka tendi ava va likolela vati, Tuakualondunge.