YOVI 35 - Embimbiliya - Bíblia Sagrada em Umbundu

¹ Elihu wa tuala vali hati,

² Wa sima okuti eci ca sunguluka? Wa sima huti, Olio esunga liange ku Suku?

³ okuti o pula, huti, Ca ñuatisa ndati? Nda nda kaile ukuakandu nda nda velapo ndati?

⁴ Ame hu kumbulula, ñumbululavo akamba vove.

⁵ Imba ovaso kilu. Vanja. Sokolola alende ndomo a kasi kupãla love.

⁶ Akandu ove a tẽla ndati oku linga cĩvi Suku? Kuenje ndaño o luisa enene akandu ove, cu linga nye?

⁷ Pamue esunga liove li kuatisa ndati Suku? Peka liove o tambulapo nye?

⁸ Akandu ove a veta lika komunu ndove. Lesunga liove li kuatisa lika omunu.

⁹ Omo okukangisa oko kualua oco omanu va litetela. Lomo okuokuo kua vakuonene kua pama oco va pinga oku va kuatisa.

¹⁰ Puãi lomue o linga hati, Suku Usovoli wange o kasi pi? O kasi pi u o tu imbisa ovisungo vuteke?

¹¹ O kasi pi u o tu longisa ca velapo, okuti ndeci a longisa ovinyama viokilu lieve ci sule, haeye o tu iha olondunge via velapo okuti olondunge violonjila viokilu vi sule?

¹² Vuteke ocili va vilikiya, eye puãi ka kumbulula omo okulituna kua vakuevĩho kualua.

¹³ Siti, Suku Tõlo ka yevi okuvilikiya kuesanda ndaño oku ku kumbulula?

¹⁴ Ka ci piãla vali enene hẽ nda ove o popia huti, Siu lete? Omo Suku o kasi ale londaka yove kuenje ove o kasi loku talamela ekumbululo liaye.

¹⁵ Puãi omo onyeño yaye ka yi yambula ci moleha okuti kokuaye ekandu hacimueko enene,

¹⁶ oco ove, u Yovi, o popia ño olondaka viaño, o luisa ño olondaka, puãi olondaka viaco ka vi kuete ukũlĩhĩso.