YOVI 34 - Embimbiliya - Bíblia Sagrada em Umbundu

¹ Oco Elifau wa popia hati,

² Avakualondunge, yevi olondaka viange. Ene vu kasi hikũlĩhĩso ñuluili ovatui.

³ Momo etui li seteka olondaka, ndeci uliakusu u mãha okulia.

⁴ Tu noli eci cesunga. Tu limbuki eci ciwa.

⁵ Momo Yovi wa linga hati, Ndimamale, kuenje Suku wa njupa esunga liange.

⁶ Ndaño ñasi lesunga haimo nukuiwa ohembi. Epute liange ka li sakuiwa ndaño sia lingile ekandu.

⁷ Omunu wa lisoka la Yovi helie okuti o nyuanyua elaviso ndovava,

⁸ haiye endaila kumue lavakuakulinga evĩho, kuenje o kuama kuama vakuakandu?

⁹ Momo wa linga hati, Ka ci kuatisa omunu oku sanjukila Suku.

¹⁰ Oco ene alombanga, njeveleli. Ci kale kupãla la Suku oku linga evĩho. Ci kale kupãla la Tõlo oku limba kakandu.

¹¹ Momo eca komunu eci ca soka lupange waye. O tiula komunu omunu eci ca soka lovilinga viaye.

¹² Ocili, Suku ka lingi cimue ca vĩha. Tõlo ka pengisa eci cesunga.

¹³ Eye hepalangako okuti o tumiwa oku viala oluali. Eye muẽle Usovoli woluali luosi.

¹⁴ Nda eye wa tambula vali omuenyo waye loku upa efuimo a fuimila omanu,

¹⁵ Mnanu vosi nda va nyolehela kumuamue kuenje omunu nda wa tiukila vali koneketela.

¹⁶ Nda o kasi lolondunge, yevelela eci mopia.

¹⁷ Umue o suvuka esunga hẽ o tela oku viala? Ove hẽ o pisa Suku ukuesunga haeye ukuonene wosi,

¹⁸ eci eye Suku a popia losoma, hati, Wucilianu, pamue lolombuale, hati, Wakuevĩho?

¹⁹ Ove hẽ o pisa Suku omo ka kuetele omanu vanene ocame? U pisa omo ka velisapo olohuasi loku kapa kutito olosuke omo vosi yavo upange wovaka aye?

²⁰ Ocipikipiki va fa. Vokati kuteke va tuñunyiwa kuenje va enda, kuenje vakuonene vopiwa puãi ha leka liomunuko.

²¹ Ovaso a Suku a lete ovilinga viomunu. Eye o kũliha okuenda kuaye kuosi.

²² Ka kuli undembo pamue owelema wowi omu vakuakulinga evĩho va tẽla oku salama.

²³ Momo Suku ka tukuila omunu otembo yoku pitila vekanga liaye.

²⁴ O nyanyola omanu vanene puãi ha loku kũlĩhisako, kuenje o tumbika vakuavo kolomangu viavo.

²⁵ Oco, omo wa kũlĩha ovilinga viavo, o va kundula kuteke kuenje va keleketiwa.

²⁶ Omo akandu avo alua oco o va vetela kovaso a vakuavo,

²⁷ omo va liweka oku u kuama, kuenje ka va yonguile oku endela volonjila viaye,

²⁸ okuti vo yevisa uteto wosuke kuenje eye wa yeva evilikiyo liukuahali.

²⁹ Nda Suku uha helie u pisa? Eci Suku a wundisa ocipala caye helie u vetisa evelo? O lavulula ofeka lomunu,

³⁰ kuenje eci o tava okuti umue ka kũlĩhile Suku o linga osoma, o tavela ño akandu omanu.

³¹ Kuli hẽ umue wa la popia la Suku hati, Nda yambuiwa, si ci lingi vali?

³² Ndongise eci ka ca ndombolokele. Nda nda linga cimue ca vĩha si ci lingi vali.

³³ Oco hẽ, ove o tukuila Suku eyambulo a ku yambula lalio omo limue eyambulo wa li likala? Momo cove oku nola, ame hameko, oco popia eci ci kasi vutima wove.

³⁴ Vakualondunge va popia lame, kuenje olonoño viosi vi njeva vi popia viti,

³⁵ Yovi o popia puãi halukũlĩhĩsoko. Olondaka viaye ka vi kuete uvanga.

³⁶ Hise nda Yovi o setekiwa toke kesulilo, momo o kumbolola ño nda vakuevĩho.

³⁷ Kakandu aye o vokiyako oku ñualelapo Suku. O popia popia Suku atonãi kuenje etu o tu yola yola epembe.