YOVI 33 - Embimbiliya - Bíblia Sagrada em Umbundu

¹ Cilo puãi, a Yovi, yeva ondaka yange. Kuluila ovatui kolondaka viange viosi.

² Kaliye ngasama, kuenje elimi li kasi vomẽla li popia.

³ Olondaka viange vi popia ocili cutima wange. Mopia muẽle locili lesunga.

⁴ Espiritu lia Suku lia sovola kuenje Suku wa fuimĩla omuenyo.

⁵ Ñumbulule nda o ci tẽla. Sokiya olondaka vioku ñumbulula. Kolisako.

⁶ Tala, ku Suku love lame tua lisoka. Lamevo nda munyuiwa kotuma ndove.

⁷ Tala, ñolele, ku ka njokokele, siu ku sindi enene.

⁸ Siti, wa popia lame, lame nda yeva eci wa popia?

⁹ O popia popia, huti, Nda yela. Si kuete ekandu. Ndimamãle, vokati kange ka muli evĩho,

¹⁰ haimo Suku o sovuila olondaka, kuenje kokuaye nda linga unyali.

¹¹ O valela olomãi viange vovikumbi. O lavulula olonjila viange viosi.

¹² Tala, eci wa popia hacociliko. Ame hu kumbulula. Momo Suku wa piãla, omunu o sule.

¹³ Nye o tamãlaila laye, huti, Ka kumbolola eci mopia?

¹⁴ Momo Suku o popia mosipo, valipo, puãi omunu ka ci limbuka.

¹⁵ O popela vonjoi, pamue vocinjonde covuteke eci omanu va kasi kotulo povola avo,

¹⁶ oco a situlula ovatui omanu, kuenje o va saluisa lelungulo,

¹⁷ okuti o tiuwiya omunu kueci cĩvi loku u tindula kokulituna kuaye.

¹⁸ O popela ocilelembia caye konjembo kuenda omuenyo waye kosipata.

¹⁹ Pula waye omunu o yambuiwavo, pamue akepa aye a vala vala ño-o,

²⁰ okuti utima waye u siluila okulia, kuenje ndaño okulia ku pepa ka ku liveli.

²¹ Etimba liaye lia kopela vowesi, lia enda. Ndãno akepa aye ka a molehele, cilo a tunda.

²² Ocilelembia caye camẽla konjembo, lomuenyo waye u kasi loku tuma olomunga viokufa.

²³ Nda eye o kuete Kapitiya kamue, pamue nda pokati kohulukãi yolomitakati via Suku pali omitakati yimue yi sapuila omunu eci co sungulukila oku linga,

²⁴ kuenje yu linga ohenda, yi sapuila Suku, yiti, U popela konjembo omo nda sanga eci ndu yovola laco,

²⁵ oco, etimba liaye li tumbuluke vali, li kuate ongusu ndeyi yovutila. Olohõlo viaye vi lisoke vali levi a kaile lavio eci a kala umalehe.—

²⁶ Oco omunu o likutilila ku Suku kuenje Suku u yeva. Omunu o pitila ku Suku lonjolela, kuenje Suku o kapa vali esunga vutima

²⁷ Noke eye imba ocisungo kovaso omanu hati, Nda linga ekandu. Nda pengisa eci cesunga, kuenje sia ci fetuluinyiwile.

²⁸ Eye wa yovola ocilelembia cange konjembo Omuenyo wange u mõla ocinyi.

²⁹ Tala, Suku o linga ovina evi viosi. O linga ndoco lomunu, luvali pamue lutatu,

³⁰ oku popela ocilelembia caye konjembo okuti o mõla ocinyi comuenyo.

³¹ A Yovi, njevelele ciwa. Uhã oco mopie.

³² Nda o kuete cimue oku popia, ñumbulule. Popia momo njongola oku ku yovuisa.

³³ Nda hacoko njevelele. Uhã kuenje hu longisa olondunge.