YOVI 32 - Embimbiliya - Bíblia Sagrada em Umbundu

¹ Oco omanu vaco vatatu va liweka oku kumbulula Yovi momo wa lisimila okuti, Ndukuesunga.

² Oco onyeño ya Elihu, omõla a Barakele u Busi ukuepata lia Rama, ya wenguka, ya wengukila Yovi momo Yovi wa soka hati, Ame ndukuesunga ku Suku.

³ Onyeño yaye ya wengukilavo akamba vatatu va Yovi omo ndaño ka va sangele ekumbululo haimo va pisa Yovi.

⁴ Elihu wa imbisilepo oku popia la Yovi momo ovo akulu eye umalehe.

⁵ Eci Elihu a limbuka okuti ka mua kaile ekumbululo vovimẽla viomanu vaco vatatu oco onyeño yaye ya wenguka.

⁶ Elihu, omõla a Barakele u Busi, wa popia hati, Ame ndumãlẽhe, ene wakulu, oco nda kala lohele, ca ndinga usumba oku vu sapuila ovisimĩlo viange.

⁷ Nda linga siti, Ukualoneke vialua eye o popia. Ukuanyamo alua eye o longisa olondunge.

⁸ Puãi omuenyo u kola u kasi vomunu, owu wo fuimĩla Suku, owo u wiha olondunge.

⁹ Hakuluko lika va kasi lolondunge, Hakongoko lika va kulĩha esunga.

¹⁰ Oco ndinga siti, Njeveleli, lamevo ndombolola ovisimĩlo viange.

¹¹ Tala, nda talamela olondaka viene. Nda talamela upopi wene wolondunge, osimbu wa sandi eci vu popia,

¹² Ndo yeveleli ciwa, kuenje tala, ka kua kaile u wa pisa Yovi. Lomue pokati kene wa kumbulula olondaka viaye.

¹³ Lunguki, sanga vu popia hoti, Tua sanga olondunge. Suku o tẽla oku u yula, omunu heyeko.

¹⁴ Yovi ka popele cimue lame, kuenje siu kumbulula lolondaka viene.

¹⁵ Va sakalala, ka va kumbulula vali. Ka va kuete eci va popia.

¹⁶ Ame puãi nalamela ño omo ka va popi, lomo va talama kuenje ka va kumbulula?

¹⁷ Ndaño ame lamevo ñumbulula, ndaño ame ndombolola ovisimĩlo viange.

¹⁸ Momo nda yukililua olondaka. Vutima muli eci ci nalamisa.

¹⁹ Utima wange wa linga ndovinyu ka vi kuete apa vi fuimĩla. Wa linga ndovipa viovinyu vi yongola oku tuika.

²⁰ Mopia muẽle okuti ci nunda vutima. Ngasama muẽle, ñumbulula.

²¹ Si kuatela omunu umue ocame. Si sivaya umue lombambe.

²² Si ci tẽla oku popia lombambe. Momo nda nda ci linga, Usovoli wange nda wa njupa ndopo.