YOVI 31 - Embimbiliya - Bíblia Sagrada em Umbundu

¹ Nda lisila lovaso ange, oco mbanja ndati ufeko?

² Momo nda oco, Suku o kasi kilu nda wa ndinga nye? Pamue ocipiñalo ce nda nda tambula ku Tõlo?

³ Ohali he ka yiya ku vakuakandu? Longongo he ka yiya ku vakuevĩho?

⁴ Suku hẽ, ka lete eci ndinga? ka kũlĩha hẽ okuenda kuange kuosi?

⁵ Nda ndaendaendaele luhembi, pamue nda nda yayoaile oku limbika,—

⁶ Suku a mesalise lombalãsa yesunga, okuti o kulĩha esunguluko liange.—

⁷ Nda nda yapukile vonjila, nda nda livelele cimue ca mõla ovaso, nda nda liñisile ovaka ange levĩho,

⁸ oco, ci kale okuti ame njimba ombuto kuenje umue wiñi o liako, ci kalevo okuti ovikũlakũla viosi viovepia liange vi tukuĩwa.

⁹ Nda utima wange wa tambiwile lukãi wamãle, pamue nda nda talamele puvelo wukuetu,

¹⁰ oco ukãi wange a sulile umue wiñi, vakuavo vo petamẽle.

¹¹ Momo oco, nda ca linga ekandu lia piãla, nda ca linga ekandu lia sesamela oku yambuiwa lolonganji.

¹² Momo ekandu liaco nda lia linga ondalu yi nyõla cosi pe. Londalu yaco nda ya mala pe ovipako viange viosi.

¹³ Nda nda lavisile ondaka yukuenje wange, pamue yufeko wange eci va mindika,

¹⁴ ame hẽ cilo ndinga nye eci Suku a katuka? Eci eya oku pula ndu kumbulula ndati?

¹⁵ Wa sowila ame vimo heyeko wo sovola eye? Homuamueko hẽ wa tu sovola vovaimo?

¹⁶ Nda nda likalele eci ca yongola osuke, nda nda malele elavoko liocimbumba,

¹⁷ nda nda lile lika liange okambu kange okuti sia ecele kamue kosiwe,—

¹⁸ momo tunde kutila Suku wa nata ndonjali, tunde vimo lia mai wa songuila,—

¹⁹ nda nda muĩle umue wa nyõlẽha omo a kamba uwalo, nda nda muĩle osuke ka yi kuete coku lisikĩlĩla,

²⁰ kuenje nda ka ya manduile, omo ndo sikĩlĩla lovipa violomeme viange,

²¹ nda nda pindikile umue ka kuete eko momo nda kũlĩha okuti volusenje va ngamela,

²² oco epepe li fuomohe kocitãi calio, lokuokuo ku soyokele vesokoluilo liakuo.

²³ Nda kaile lohele sanga Suku o nalisa ohali oco sia telele oku vi linga. Unene waye wa njokokisa.

²⁴ Nda nda kolelele ulu, okuti nda popele lulu siti, Vukolelo liange,

²⁵ nda nda yolelele omo ukuasi wange wa lua, lomo eka liange lia kuata ca lua,

²⁶ nda nda vanjele kekumbi eci lia tua, pamue kosãi eci yamako lulamba,

²⁷ kuenje nda utima wange wa tambiwile laco uyombeki, pamue nda nda vi fendelele loku sipula peka,

²⁸ eci lacovo nda ca linga ekandu lia sesamela oku yambuiwa lolonganji; omo nda ca lomboloka okuti nda lingila usuanji Suku o kasi kilu.

²⁹ Nda nda sanjukilile okunyõlẽha ku wa suvuka, pamue nda nda yolelele eci cĩvi co sanga,—

³⁰ Sia tavele okuti omẽla wange u linga ekandu lioku pingila omuenyo waye esiñalo.—

³¹ Nda vakuambalaka yange ka va popele vati,

³² kekutile ositu yaye?— Ukombe ka pekelele voluwa, nda yikuluila olongende apito ange.—

³³ Nda nda wundisile akandu ange vonete yange loku a sitika okuti omanu ka va a moli

³⁴ omo nda kuatela omanu usumba walua, kuenje epembe liapata lia njokokisa okuti ndoha, kuenje sia tundilile posamua…

³⁵ Nda nda kaile lumue o njevelela! Ekolelo liange lieli: Ukuonenewosi eye o netuluila! Nda nda kaile lukanda omu mua sonehiwa ondaka unyali wange a mindika layo!

³⁶ Nda nda kaile la wo nda ndo wambatela pocitai, nda ndo futa ndekolowa.

³⁷ Nda nda pitila ku Tõlo lomoko ndosoma, loku u sapuila cosi comuenyo wange.

³⁸ Nda osi nda lima ya mindikile loku misa, nda ovipanga viayo via lililile kumuamue,—

³⁹ nda nda lile ovaima ayo ocali, nda nda kokelele okufa vamuẽle yaco,

⁴⁰ oco ocambanda ci tunde, otiliku hayoko, lovimbuandu vi tunde, osevata hayoko. Olondaka via Yovi via sula.