YOVI 30 - Embimbiliya - Bíblia Sagrada em Umbundu

¹ Kaliye oloneñe viange vi njola epembe, okuti vaisiavo nda sia tavele oku va iha upange wolombua vi tata ocunda.

² Ongusu yovaka ava va pua olohõlo yi ñuatisa ndati?

³ Omo usuke lonjala ovio via lua oco va kunya ongongo ya kukuta ndaño eve.

⁴ Va lia amẽla ovinjumbianjumbia. Va takila olonjanjo viusamba.

⁵ Va lupuisua pokati komanu. Va va suvikiya ndeci va lingainga ocimunu.

⁶ Va kala kala vakungu a lifẽla lendunde pamue vovalungi ovongongo lovaleva ovovawe.

⁷ Va litetelela vovinjumbianjumbia. Va lisunila vovisapa.

⁸ Vosi yavo ovitende, ka va sumbiwa. Va lupuisua vofeka loluhava.

⁹ Kaliye nda linga ocisungo cavo, nda lingavo olusapo luavo.

¹⁰ Va nyẽhula, va mita ombamba. Eci va mõla ka va likandangiya oku siya ovate.

¹¹ Omo Suku wa yongisa olusipa luohonji yange kuenje wa ñetisa, oco ovo ka va likandangiya oku membula eci va mõla.

¹² Kondio kua ñatukila owiñi. Va nungayaisa ño-o. Va mongiyila eci va nyola laco.

¹³ Va nyõla onjila yange. Va amisako ohali yange, kuenje lomue o va lemela.

¹⁴ Va ngendela ndoku pita vepangu linene. Pokati konjuela yokutuiya kuaco va ngundumuhĩla.

¹⁵ Via lua vi njokokisa via ñuala. Ndeci ofela yambata haico esunga liange li tatamisua. Okusalala kuange kua pita ndelende.

¹⁶ Kaliye upongo wange u sukumuhĩla loloneke viohali ovio viange.

¹⁷ Kuteke akepa a vala lolongembia via lua ka vi tepuluka.

¹⁸ Uwalo wange u nyanyõha lokulimbaimba kuolongembia. Vi ñueka ndeci ci kueka osingo yocikutu.

¹⁹ Suku wa njimba vonata. Nda lisoka loneketela letiko.

²⁰ Ndi ku vilikiya kuenje ku ñumbulula. Nãi kuenje ku ndete.

²¹ Wa pongoloka, wa ndingila ongangala. O nalisa ohali lolohõlo vieka liove.

²² O nakumuĩla vofela, o ngendisilamo. O nakatisa vekungukungu.

²³ Ndi ci okuti o nuala kokufa, konjo ya sokiyiwila vakuamuenyo vosi.

²⁴ Haimo nda ovimano vi ulumuhila omunu, omunu waco hẽ ka olola eka? Vohali yaye hẽ, ka vilikiya okuti vo kuatisa?

²⁵ Ame hẽ, sia lililile u wa kala lohali? Utima wange hẽ, ka wa sumuĩlĩle osuke?

²⁶ Puãi eci ame muẽle nda lavoka esumulũho oco esumuo lieya, leci nda talamẽla utanya oco owelema weya.

²⁷ Oco utima wange wa sakalala, ko puyuka. Oloneke viohali vi njiyilila.

²⁸ Nda tekavelua puãi halutanyako. Mbotoka vonjango oku pinga ekuatiso.

²⁹ Ndi manji yolombulu. Ngendaenda kumue lolombo.

³⁰ Ekova liange lia pongoloka oku tekava kuenje li tunda olombande. Akepa ange a kuata owuya.

³¹ Elaka liokalialia kange lia pongoloka oku litetela, lelaka liolumbendo luange lia pongoloka oku lila.