YOVI 3 - Embimbiliya - Bíblia Sagrada em Umbundu

¹ Oco noke Yovi wa fetika oku vangula kuenje wa siñala eteke liaye lioku citiwa.

² Kuenje Yovi wa popia hati,

³ Eteke nda citiwa li takate, haico uteke va popia vati, Omõla ulume we miniwa.

⁴ Eteke liaco li linge owelema. Suku o kasi kilu ka ka li pule. Ocinyi ka ci ka li tuile vali.

⁵ Owelema lulembo wokufa u kale lalio. Elende li li tungileko. Cosi ci tekãvĩsa utanya ci li yokokise.

⁶ Owelema wosito u kuate uteke waco. Ka u ka sanjukile kumue loloneke vikuavo viunyamo. Ka u ka tendiwe volosãi.

⁷ Puãi uteke waco u linge ño wesumuo. Ka mu ka yevale ondaka yonjolela.

⁸ Ava va tẽla oku liangula oloneke, haivo va loñolõha oku votola canjangombe, vo liangule.

⁹ Olombungululu viongula yawo vi pue ocinyi, u lavoke ongula puãi ongula ka yi keye. Ka u ka mole ovisokopia viomẽle,

¹⁰ omo ka wa sitikile imo lia mãi, ndaño oku mbindikiyila ovaso ohali.

¹¹ Nye sia filile poku citiwa? Nye sia tulilile omuenyo eci mãi a nyita?

¹² Olongolo via nambuila nye? Avele a nyamisila nye?

¹³ Momo nda hacoko nda nda pekela loku uha. Nda nda pekelele okuti nda nda puyukilile

¹⁴ kumosi lolosoma lakulu vofeka, vana va litungila olombila ka vi pui,

¹⁵ pamue kumosi lolombuale via kaile lulu, haivio via yukisa olonjo viavo lopalata.

¹⁶ Nye sia pulumuiwilile okuti ñala ndoloñaña ka via la mola ocinyi?

¹⁷ Oko vakuevĩho va liwekela oku linga cĩvi haiko vakuekavo va puyukila.

¹⁸ Oko olomandekua vi puyukila pamosi. Ka vi yevi ondaka yu o va lingisa.

¹⁹ Ava vatito lava vanene haiko va kasi. Lupika ka kasi vali peka lia cime caye.

²⁰ Ocinyi ci tuila nye ukuahali? Lomuenyo wa eciwila nye kuava va teka utima?

²¹ Haivo va livela okufa puãi ka ku iya. Va ku sandiliya ca lua, ndomo va sandiliya ukuasi wa solekiwa ci sule.

²² Va yolela ca lua, kuenje va sanjuka eci va sanga eyambo.

²³ Ocinyi ceciwila nye komunu nda onjila yaye ya wunda, haeye Suku wo wumbilamo?

²⁴ Okutula kuange omuenyo ku linga okulia kuange. Okuleñaleña kuange ku tunda ndovava.

²⁵ Eci ca ndinga usumba oco ca sanga. Ocina nda kuatela ohele oco ci ñuete.

²⁶ Sia tulile utima, si kasi ciwa. Oku kavuluka si ci tela. Ohali yiyaiya.