YOVI 29 - Embimbiliya - Bíblia Sagrada em Umbundu

¹ Yovi wa amisako vali ondaka yaye hati,

² Nda nda kaile ndeci nda kaile kolosãi via pita! Nda nda kaile ndeci nda kaile eci Suku a ndava ndava,—

³ eci ovela yaye ya tuila tuila kutue wange, kuenje nda pita pita vowelema locinyi caye,—

⁴ ndeci nda kaile koloneke viange viepuiti, eci ukamba wa Suku wa kala vonjo yange,—

⁵ eci Ukuonenewosi handi a kala lame kuenje omãla vange va ñuala,—

⁶ eci okuenda kuange kuosi kua ndelukile lolomãi viange via sukuiwile longundi, kuenje kocisokawe kua nundila olondui viulela!

⁷ Eci nda tundaila kombundi yimbo, loku angiliya omangu yange vocila,

⁸ oco amalehe eci va mõla va tiukila ovimbetate, lakongo va votoka ha va talama vilu,

⁹ lolombuale via liweka oku vangula, kuenje via likuata komẽla;

¹⁰ londaka yakulu vofeka yõha. Alimi avo a lamẽlela viliakusu viavo.

¹¹ Eci etui lia njeva lia sivaya, leci iso lia mõla lia njimbila,

¹² momo nda popela osuke ya vilikiya, losiwe ka ya kaile loñuatisi.

¹³ Esivayo liu wa sokele oku nyolẽha lia sanga. Nda kokela ocimbumba utima woku imba lesanju.

¹⁴ Nda wala esunga kuenje lia sikĩlila. Esunga liange lia linga evatulo locifuto.

¹⁵ Nda linga ovaso olomeke, nda lingavo olomãi viovilema.

¹⁶ Nda linga isia yolosuke, nda kũlĩhĩsa ondaka yu sia kũlĩhĩle.

¹⁷ Nda teya olombanjo viavakueviho. Nda nyẽha ohute kovayo aye.

¹⁸ Oco nda sokoluile siti, Ndi fila vocanju cange. Ndi luisa oloneke viange ndeseke.

¹⁹ Olombombo viange vi yandela kovava. Olume lu nosela uteke wosi kovianja viange.

²⁰ Ulamba wange u talala ño-o. Ohonji yange yi siva ño-o peka liange.

²¹ Omanu va njevelela loku uha, oku talamela alungulo ange.

²² Nda nda popia ovo ka va popi vali; londaka yange ya va yevala ndondaka ka yi patãliwa.

²³ Va nalamãilãile ndeci omanu va talamela ombela. Va asayama ndeci omanu va asamẽla ombela yomandavela.

²⁴ Nda va kolisa eci va sokele oku konyoha. Ocinyi cocipala cange ka va ci pukuile.

²⁵ Nda va nolaila onjila yavo, nda kala nda sekulu yavo. Nda kala ndosoma yi kasi kolohoka viaye. Nda lembeleka vakuakulila.