YOVI 28 - Embimbiliya - Bíblia Sagrada em Umbundu

¹ Ocili, opalata yi kasi loku yi tunda, kuenje ulu u yenguluiwa u kuete oku u sangiwa.

² Utale u fẽliwa posi. Okovili yi yenguluiwa vewe.

³ Omanu va imũla owelema. Va moñoluila vonumbi lowelema toke va sanga utale u yenguluiwa.

⁴ Va fẽla ovitunu volomaka vi kasi kupãla loku ku tunga omanu. Va ivaliwa lava va pita pita kilu. Va nyoñamisua kupãla lomanu, va linyenganyenga.

⁵ Kilu liongongo ku tunda okulia. Vemehi liayo puãi va tetola ovawe, huti ño ondalu.

⁶ Ovawe ayo a kasi losafira. Ongongo yi kuete eseke liulu.

⁷ Elila li endako layimue onjila yi li kũliha. Ndaño iso liociselele ka lia la li mõla.

⁸ Ovinyama viukasa ka via la endelamo. Ndaño ohosi ka ya la pitamo.

⁹ Omunu o kapa eka liaye kovawe ondalu. O tingulula olomunda toke kolombombo viavio.

¹⁰ O tuiya akũla vovawe kuenje ovava a pita. Iso liaye li lete ovina viosi via tila.

¹¹ O sitika olondui okuti ka vi nosa nosa, leci ca wundisua o ci nena kutanya.

¹² Puãi olondunge vi sangiwa pi? Ocitumãlo colondunge ci kasi pi?

¹³ Lomue o kũliha onjila yendako. Ka vi sangiwa vofeka ya vakuamuenyo.

¹⁴ Elondo liti, Mulo ka vi kasimo. Kalunga hati, Ka vi kasi lame.

¹⁵ Ka vi landiwa lulu, lopalata ka yi pesalisiwila ondando yavio.

¹⁶ Ka vi sokisua lulu woko Ofiri pamue lewe lia tila lia sardonika, ndaño losafira.

¹⁷ Ulu lovitulu ka vi tẽla oku lisoka lavio. Ndaño oku vi pitisila ovingelengele viulu wa fina ka ci tava.

¹⁸ Oku tukula akuãlãli pamue olomota via tĩla okuti o vi sokisa lolondunge, ka ci tava. Momo ondando yolondunge ya velapo, yolomota via tila yi sule.

¹⁹ Ka vi sokisua lo topajio yo ke Etiopia. Oku vi tukuila ondando yulu wa fina ka tava.

²⁰ Oco hẽ olondunge vi tunda pi? Locitumãlo colondunge ci kasi pi?

²¹ Via sitikiwila vakuamuenyo vosi, kuenje via wundisilua olonjila viokilu.

²² Njembo la Kufa va popia vati, Tua yeva oluhimo luaco lovatui etu.

²³ Suku wa kũlĩha onjila yendako, haeye wa kũlihavo ocitumãlo cavio.

²⁴ Momo eye o vanja toke kasulilo oluali, o lete cosi ci kasi vemi lilu.

²⁵ Eci a eca kofela ongusu yayo loku yonga ovava okalunga,

²⁶ leci a eca kombela ovihandeleko viayo loku sokiya onjila yociliakulo covilemĩlo,

²⁷ oco a mõla olondunge kuenje wa vi sapula. Wa vi tumalisa loku vi moñolola.

²⁸ Yu wa popia lomanu hati, Tala, oku sumbila Yehova oko olondunge. Oku tinduka kevĩho oko uvanga.