YOVI 27 - Embimbiliya - Bíblia Sagrada em Umbundu

¹ Yovi wa tuala vali hati,

² La Suku o kasi lomuenyo, una wa pukula esunga liange, haeye Fũ, una o kasi loku mbalola vutima,

³ osimbu ñasi lomuenyo, lefuimo lia Suku li kasi vanyulu ange,

⁴ omẽla wange ka u popi uhembi, lelimbi liange ka li limbika.

⁵ Oku tava okuti ondaka yove yocili, ku kale kupãla lame. Toke fa si liweka kesunga liange.

⁶ Ñuata muẽle kesunga liange, si eciko. Oku sokolola omuenyo wange wosi vutima ka muiya episo.

⁷ Unyãli wange a lisoke lukuevĩho, lu o ñatukila a lisoke lu ka kuete esunga.

⁸ Elavoko liu ka kolela Suku li kala pi eci Suku o tepako, leci Suku o wupa omuenyo waye?

⁹ Suku he o yeva evilikiyo liaye eci ohali yu sanga?

¹⁰ O sanjukila hẽ Suku Tõlo? O vilikiya Suku olonjanja viosi?

¹¹ Ndi vu longisa ovina vieka lia Suku. Si vu sitikila eci ci kasi la Suku Tõlo.

¹² Vosi yene wa ci limuili. Oco hẽ nye vu lipandelela ukũlĩhĩso wene?

¹³ Eci Suku a sokiyila ukuevĩho, haico ocipiñalo ondiandia yi tambula ku Suku Tõlo, ceci, cokuti,

¹⁴ Omãla vaye nda va lua va luila osipata, lolonekulu viaye ka vi kuete okulia ku va tẽla.

¹⁵ Ava a sia va liwa lefengi. Ocimbumba ca siala ka cu lili.

¹⁶ Ndaño o lundika opalata ndeve, pamue o longeka uwalo ndotuma,

¹⁷ ci tava, a longeke, puãi vakuesunga ovo vo wala, kuenje ava va pua eko ovo va liamuĩla opalata.

¹⁸ Onjo a tunga ya soka luwavi, pamue lokanjo kukuakulava.

¹⁹ Eteke limue o pekela tupu ohuasi; puãi onjanja yaco oyo ya sulako. Eci a pasuka omele ukuasi waye ka-u-ko vali.

²⁰ Evi vi yokokisa viu wambata ndendunde. Uteke ehunguhungu liu nyõla.

²¹ Ofela yokutundilo yu katula kuenje wa enda. Vocitumãlo caye yu wupamo,

²² yu sika, ka yi kuete ohenda. Eye o tila lolupesi ongusu yayo.

²³ Omanu va panduila ohali yaye. Lepembe liavo liu tundisa kocitumãlo caye.