YOVI 22 - Embimbiliya - Bíblia Sagrada em Umbundu

¹ Oco Elifasi u Temani wa kumbulula hati,

² Omunu he o tẽla oku kuatisa Suku? Siti umue wa lunguka o likuatisa eye muẽle.

³ Nda ove o sunguluka ci kuatisa Tõlo? Nda ove o pua eko eye o kuatisiwa laco?

⁴ Eye he o ku yambula omo esunga liove lialua? O ku pisa omo wa sunguluka?

⁵ Evĩho liove hẽ ka lia luile? Olohole viove ka vi kasi lesulilo.

⁶ Momo koku tambula ku vakuẽle onjeke lolosindike kua kaile lesunga. Vakuepẽle wa va tambula uwalo wavo ndonjeke.

⁷ Ava va kava kua va ihile ovava oku nyua. Lava va kasi lonjala wa va limĩla ombolo.

⁸ Omunu wa kala lunene eye wa kuata ofeka, lu wa kemãla eye wa tungamo.

⁹ Wa tundisa ovimbumba upolokoso, kuenje wa kangisa olosiwe.

¹⁰ Oco olonjanjo via ku ñuala, locinjoko cocipikipiki ci ku kuete.

¹¹ Ocinyi cove ca linga owelema okuti ku lete, landunde ovava a ku tuvika.

¹² Suku hẽ ka kasi kilu kupãla? Vanja olombungululu vi kasi kupãla. Kuna vi kasi, siti ka ku ci.

¹³ Oco vu popia hoti, Suku wa kulĩha nye? Vowelema wosito o tẽla ndati oku tetulula?

¹⁴ Alende osito o sikĩlĩla okuti ka lete. O ñuala ñuala kolusoka luilu.

¹⁵ Ene wendeli ño-o vonjila yale, muna mua endela vakuevĩho?

¹⁶ Vopiwa tupu otembo yavo ka ya pitilile. Oviseveto viavo viambatiwa lendunde.

¹⁷ Va popia la Suku vati, Tu tunde; kuenda vali vati, Tõlo o tu kuatisa ndati?

¹⁸ Haimo Suku wa yukisa olonjo viavo levi viwa. Ahãla a vakuevĩho a kasi kupãla laye.

¹⁹ Vakuesunga va ci lete kuenje va sanjuka. Ava va pua eko va va yola epembe,

²⁰ vati, Ocili ovanyali vetu va takata, leci va sia ondalu ya ci lia.

²¹ Tava ku Suku, loku tula utima kuenje ci ku nenela esumũluho.

²² Longiwa lolondaka vi tunda komela waye. Vi seleka vutima wove.

²³ Nda o tiukila ku Tõlo loku liketisa, nda o tundisa evĩho vonjo yove,

²⁴ nda winasi ño ukuasi wove, okuti ulu woko Ofiri o wimba volui,

²⁵ nda Tõlo o linga ulu wove, haeye o linga opalata yove ya tĩla,

²⁶ nda o linga ovina evi ca lomboloka okuti o sanjukila Tõlo kuenje wimba ovaso ku Suku.

²⁷ O likutilila kokuaye kuenje o ku yeva, o lemulũla ovisila viove.

²⁸ O sokiya cimue, kuenje ci pita ciwa. Ocinyi ci tuila volonjila viove.

²⁹ Momo Suku o ketisa vakuakulituna, puãi o popela ava va likapa kutito.

³⁰ O popela ava va pua eko, love o popeliwa lokuyela kuovaka ove.