YOVI 21 - Embimbiliya - Bíblia Sagrada em Umbundu

¹ Oco Yovi wa kumbulula hati,

² Yeveleli lutate eci mopia oco wu limbuka elembeleko liene ndomo lia njevala!

³ Ndinge ohenda oco mopie. Eci nda mala oku popia oco ci tava, fuanguli ño.

⁴ Ame hẽ omunu mbetela evelo? Mandikisila nye vali?

⁵ Mbanji loku lisalukako. Likuati no kolomẽla.

⁶ Ndaño ame oku ci sokolola ndi lisalukako kuenje fetika oku luluma.

⁷ Ci kasi ndati okuti vakuevĩho va kala lomuenyo haivo va linga akongo, kuenje vamamako lunene?

⁸ Omãla vavo va hindingila kovaso avo, kuenje va mõla okuamako kuolonekulu viavo.

⁹ Olonjo viavo via koka, usumba ka muli, Ombueti ya Suku ka yi va veta.

¹⁰ Onui yavo ka yi londi ño olivova. Onjindi yavo yi cita, ka yi pulumula.

¹¹ Va tundisa otumãla tuavo ndocunda. Omãla vavo va tomboaka loku papãla.

¹² Va imba ocisungo loñoma lohalupa. Va yolela okusika kuolumbendo.

¹³ Oloneke viavo vi pita loku salala. Va lokila konjembo lombembua.

¹⁴ Va sapuila Suku vati, Tu tunde. Ka tu yongola ukũlĩhĩso wolonjila viove.

¹⁵ Tõlo nga eye nye okuti tu u vumba? Ci tu kuatisa ndati oku likutilila kokuaye?

¹⁶ Elau liavo hẽ ka li kasi povaka avo? Ahãla a vakuevĩho a kasi kupãla la Suku.

¹⁷ Olonjanja viñami hẽ ondiyelo ya vakuevĩho yimiwa? Olonjanja viñami elamba li va wila? Olonjanja viñami onyeño ya Suku yi va amuĩla olongembia

¹⁸ okuti va linga ndovinene vi enda lofela, pamue ndovisaikiti vi ambatiwa lehunguhungu?

¹⁹ Ene vu popia hoti, Suku o solekela omãla akandu olonjali viavo. A va fetuluinye ovo muẽle okuti va ci limbuka.

²⁰ Ovaso avo muẽle a mole okunyõleha kuavo. Ovo muẽle va nyue konyeño ya Tõlo.

²¹ Apata avo va kuete lao nye eci otembo ya va sokiyilua ya puako?

²² Kuli hẽ umue o tẽla oku longisa Suku ukũlĩhiso? Siti, eye o tetuluila ava va kasi kilu?

²³ Omanu vavali va fa. Umue o fa tupu ohuasi, wa salala ca lua, utima waye wa tula, haeye wa koka.

²⁴ Etimba liaye lia neta kuenda upuma wovakepa aye u sapita.

²⁵ Ukavo o fa tupu osuke, wa sumua vutima omo ka la kũliha oku salala.

²⁶ Kavali kavo va pekela voneketela ve yuka ovanyo.

²⁷ Tala, nda kũlĩha ovisimilo viene, lahãla ene oku ndinga cĩvi.

²⁸ Momo vu popia hoti, Onjo yombuale yi kasi pi? Onjo yukuevĩho yi kasi pi?

²⁹ Ka wa pulili he olongende? Ka vu kolela uvangi wavio

³⁰ okuti ukuevĩho o puluka veteke liongongo, haeye o popeliwa veteke lionyeño?

³¹ Helie o kuete utõi woku pisa ovituwa viaye kovaso aye? Helie u yambuila eci a linga?

³² Kovaso yoku u kenda eyambo liaye li tatiwa lulamba.

³³ Posi ya leñela yondamba o pekela lombe mbua. Kuenje, omo osimbu ka file valua vo sanjukila, oco konambi yaye valua vo sindikila.

³⁴ Oco hẽ, ci tava ndati oku ndembeleka lolondaka viesanda? Kakumbululo ene ka kuli cimue te uhembi.