YOVI 20 - Embimbiliya - Bíblia Sagrada em Umbundu

¹ Oco Cofare u Namati wa kumbulula, hati, Omo vutima muli onjanga yoku kumbulula,

² oco ovisimilo viange vi sakalaisa.

³ Njevite episo limue li kasi loku nondala. Oku likala oku ku kumbulula utima wange ka u tava.

⁴ Kua kulĩhĩle okuti tunde kosiahũlu, tunde muẽle omunu a kapiwa kilu lieve,

⁵ onjolela ya vakuevĩho ka yi tumãla osimbu, lesanju liava ka va kolela Suku li pita lonjanga?

⁶ Ndaño utunga waye u pitila kilu, lutue waye u pitila kalende,

⁷ haimo o takata pe ndeniña liaye. Ava vo kũlĩha va pula vati, O kasi pi?

⁸ O pita ndonjoi, ka sangiwa vali, o lupuisua ndocinjoinjoi covuteke.

⁹ Iso lio mõla mõla ka liu mõli vali. Eye ka pitila vali kocitumãlo caye.

¹⁰ Omãla vaye va tiula osembulule kolosuke. Ovaka aye ondolola ukuasi wa iviwile.

¹¹ Akepa aye e yuka olohõlo viovutila, puãi vi pekela laye voneketela.

¹² Ndaño evĩho li sõsa vomẽla waye, kuenje o li kuta ketama

¹³ okuti ka yongola oku li ina, kuenje o kala ño lalio vomẽla,

¹⁴ haimo okulia kuaye ku pongoluiwa vimo, kuenje ku linga ndondulu vokati kaye.

¹⁵ Ina ukuasi kuenje u sanja vali, Suku wo wupa vimo liaye.

¹⁶ O sipa owule wakuiva. Elimi liombuta liu wipaya.

¹⁷ Ka vanji kolondui, ka sanjukila olondui viowiki levi viasenjele.

¹⁸ Eci ci tunda kupange waye o ci tiula, ka ci li. Kokufũla kuaye ka ku tundi eci cu sanjuisa.

¹⁹ Omo a kangisa olosuke loku vi yanduluka kuenje wa punda onjo ka tungile,

²⁰ lomo ocipululu caye ka ci pua pua, kuenje ka seleka cimue cu sanjuisa,

²¹ okuti o mala pe okulia vo sokiyila, oco okusalala kuaye ka ku tumãla.

²² Eci elau liaye li supoka o sakalala. Ocilemo cosi cohali yaye cu wila.

²³ Oku yukisa imo liaye Suku u muisa onyeño yaye ya lua, o yu lokisila ndokulia kuaye.

²⁴ O tila ocimaleho cutale, kuenje usongo wosipi u wasa.

²⁵ Upiwa, u tunda vetimba liaye. Osongo yawo ya tua yupiwa kondulu yaye. Ocinjoko cu kuata.

²⁶ Owelema wosito u solekelua ovipako viaye. Ondalu ka yi pepeleliwa yu lia, yi liavo cosi ca siala vonjo yaye.

²⁷ Ilu li situlula evĩho liaye, kuenje ongongo yu katukila.

²⁸ Veteke lionyeño ya Suku ovikuata vionjo yaye vi pundiwa kuenje vi tualiwa kupãla.

²⁹ Eyi oyo onepa ya eciwa la Suku kukuevĩho, haiyo ocipiñalo co tukuilua la Suku.