YOVI 2 - Embimbiliya - Bíblia Sagrada em Umbundu

¹ Eteke limue likuavo eci omãla va Suku veya oku lilekisa ku Yehova, oco Satana weyavo kumosi lavo oku lilekisa ku Yehova.

² Yehova wa popia la Satana hati, O tunda pi? Satana wa kumbulula Yehova hati, Nda tunda koku tungayala kilu lieve loku ñuala ñualako.

³ Yehova wa popia la Satana hati, Wa limbuka ukuenje wange Yovi okuti kilu lieve ka kuli ukuavo wa lisoka laye, omunu wa pua etondelo haeye ukuesunga, o sumba Suku, Kuenje o suvuka evĩho? Ndaño wa ñokelele utima woku tava oku u nyõla ño ocali haimo ka liwekele kesunga liaye.

⁴ Satana wa Kumbulula Yehova, hati, Ekova lekova! Cosi omunu a kasi laco o ci ecela omuenyo waye.

⁵ Puãi imba eka liove, lamba ekepa liaye letimba liaye kuenje eye o ku likalela Kovaso ove.

⁶ Yehova wa popia la Satana hati, Tala, o kasi peka liove, cimosi lika, popela omuenyo waye.

⁷ Oco Satana wa tunda ku Yehova kuenje wa veta Yovi apute ãvi tunde pomãi toke ponumbutue.

⁸ Yovi wa nyañula ociyo oku lisuya laco kuenje wa tumãla peyala.

⁹ Oco ukãi waye wo pula hati, Lopo nga wa kolela okuti esunga olio lia velapo? Siñala ño Suku kuenje fa.

¹⁰ Puãi Yovi wo kumbulula hati, O popia ndukãi emamohe. Peka lia Suku nga, tu tambula lika eci ciwa, ka tu tambulavo hẽ eci cĩvi? Kovina evi viosi Yovi ka lingile ekandu lomẽla waye.

¹¹ Eci akamba vatatu va Yovi va yevaovina evi viosi vĩvi a kasi lavio, oco veya, omunu omunu lokimbo liavo okuti Elifasi u Temani, la Bilidade u Siuhi, kuenda Cofare u Namati. Va liusika eteke lioku ka ñualehẽla ha va endi oku u pasula loku u lembeleka.

¹² Eci vo muĩla kupãla ka vo limbukile, va kaluka loku lila, va tola olonanga viavo kuenje va imba oneketela vilu.

¹³ Va tumãla posi laye ovotanya epanduvali, puãi lomue wa popia laye ondaka, momo va limbuka okuti olongembia viaye via lua.