YOVI 19 - Embimbiliya - Bíblia Sagrada em Umbundu

¹ Oco Yovi wa kumbulula hati,

² Toke pi vu sakalaisa ño-o? Toke pi vu sasõla lolondaka?

³ Olonjanja evi ekuĩ wa seteki oku sepuisa, ka cu kutisi hẽ osõi oku ñangisa?

⁴ Ndaño ca kaile okuti nda lingile ekandu, ekandu liaco nda lia mbuila ame muẽle.

⁵ Nda ocili wa likapi koku misa kuenda koku lekisa okuti okusepuisua kuange kueyilila ekandu liange,

⁶ limbuki okuti nda oco, Suku eye wa pengisa ondaka yange, haeye wa ñuatela vowanda waye.

⁷ Eci ndi likutilila siti, Mopele, si kumbu-Mbilikiya lolukandi puãi si sangi ekuatiso.

⁸ Wa sitika onjila yange okuti si piti. Volonjila viange wa kapamo owelema.

⁹ Wa ndula ulamba wange. Wa njupa ekolowa kutue.

¹⁰ Wa nungulula pe kuenje nda enda, lelavoko liange wa li tukũla nduti.

¹¹ Wa mbuenguila onyeño yaye, kuenje wa nenda ndunyãli waye.

¹² Olohoka viaye vi ongoloka, via ñapela olondunda viovita, lonjo yange via yi ñuala ocingonja.

¹³ Wa kapa vakuetu kupãla lame, lolonjiwe viange via litepa lame.

¹⁴ Vangandiange lakamba vange va velapo, vosi va nokoka.

¹⁵ Akombe vonjo yange va njivala, lafeko vange va nenda ndukombe. Kovaso avo ñasi ndukualofeka.

¹⁶ Ñovonga ukuenje wange, eye puãi ka ñumbulula, te oku u peya loku u livondela.

¹⁷ Ukãi wange ndu lingisa onyanya. Ndinga onyanya ndaño komala va mãi wa nyita.

¹⁸ Ndaño omãla va sepula. Eci mbotoka oku enda va mopia cĩvi.

¹⁹ Akamba vange vocili vosi va suvuka. Ava nda kolela va ngu sia.

²⁰ Akepa ange a lamẽlẽla kekova liange. Nda puluka puãi nda siala lika lakepa.

²¹ Ndingi ohenda, ndingi ohenda, ene akamba vange, momo eka lia Suku lia ndamba.

²² Nye vu ndanduila ño ndeci Suku? Ka wa maleli hẽ oku ndundila?

²³ Nda ca tavele oku soneha olondaka via nge! Nda ca tavele oku vi soneha velivulu limue!

²⁴ Nda ca tavele oku kuata opena yutale pamue osumbu okuti vi sonehiwa kewe kuenje ka vi pui vali!

²⁵ Momo ame ndi ci okuti Onjovoli yange o kasi lomuenyo, kuenje kesulilo iya kilu lieve.

²⁶ Etimba eli li nyõlẽha muẽle, puãi kovaso yaco mõla Suku.

²⁷ Ndu mõla muẽle, ndu limuila ame muẽle. Ovaso ange muẽle o mõla, umue wiñi haeyeko. Oku ci sokolola utima wambuka.

²⁸ Nda vu popia hoti, Tu kolisiko ño oku u talisa ohali, pamue hoti, Esĩla liohali yaye li kasi vokati kaye muẽle,—

²⁹ kali lusumba wosipata. Momo onyeño yi koka okuyambuiwa losipata kuenje oco vu kũliha okuti kuli ekanga.