YOVI 18 - Embimbiliya - Bíblia Sagrada em Umbundu

¹ Oco Bilidade u Siuhi wa kumbulula hati,

² Toke pi o vanjiliya olondaka? Sokolola handi oco tu vangule noke.

³ Nye tu tendiwila ndovinyama? Ci kasi ndati okuti kokuove tu kasi ño ndava va wulua?

⁴ Ove, vukuakulitukõlõla lonyeño, wa sima nga okuti oluali luosi lu ku kapiwila okatikitiki? Wa sima okuti ewe li ku upiwila loku sondoluiwa?

⁵ Ocili, ocinyi cukuevĩho ci imiwa, lulienge wondalu yaye ko taima.

⁶ Ocinyi covonjo yaye ci tekãva. Ondiyelo yokilu liaye yimiwa.

⁷ Okuenda kuaye lolohõlo ku tepuluka. Ahãla aye muẽle o kupula.

⁸ Momo olomãi viaye muẽle vio wimba vonjanjo. O kupukila vongumbu.

⁹ Ociliva cu kuata kocisendemãi. O fa vulivi.

¹⁰ Vo kapela posi ukolo woku u kasuisapo. Vonjila vo kapelamo upeto.

¹¹ Kolonẽle viosi kuli evi viu yokokisa haivio viu landula volomãi.

¹² Enyõlẽho li kuete onjala yoku u kuata. Ohali yi taiyilili okulikonjoka kuaye.

¹³ Uvei u lia ekova liaye, luveli wokufa u lia ovimatamata viaye.

¹⁴ Upiwa vonjo yaye ya koleliwa kuenje o tualiwa kosoma ya piãla koku yokokisa.

¹⁵ Onjo yaye yi yelisua lovihemba viofuofuo kuenje mu piñala ava kavasitue laye.

¹⁶ Olombombo viaye vi kukutila posi, lovianja viaye vi uvukĩla kilu.

¹⁷ Kilu lieve ka ivalukiwa vali. Londuko yaye ka yi tukuiwa vali valuwa.

¹⁸ Eye upiwa vocinyi, inasiwa vowelema, o tundisua voluali.

¹⁹ Ka kala lomõla pamue onekulu pokati kepata liaye, ndaño umue waye vofeka yavo.

²⁰ Vakuotundilo va komõhela eci ca pita laye, kuenje vakuotakelo va ci lulumila.

²¹ Ocili, oco ci pita lolonjo via vakueviho, oco ci pita lu ka kũlĩhĩle Suku.