YOVI 16 - Embimbiliya - Bíblia Sagrada em Umbundu

¹ Oco Yovi wa kumbulula hati,

² Ovina via lua ndevi ndi vi yeva yeva. Ene vosi vulondembeleki viesanda.

³ Olondaka viofela hẽ vi sulila? Co kokeli oku kumbulula oco nye?

⁴ Oku popia ndene lamevo nda ndi ci tẽla nda ene wa kaili ndeci ñasi ame; nda nda tela oku u longekeli olondaka, loku u lipukaili utue;

⁵ nda nda tela oku u kolisi lomẽla wange, lelembeleko liomẽla wange nda lia tepulula olongembia viene.

⁶ Nda mopia, olongembia viange ka vi tepuluka. Nda nguha, eci ci nunda oco nye?

⁷ Cilo Suku wa fũfũla enene haeye wa kundula vakuetu vosi.

⁸ Suku wa ñokela anyole lanyole aco a linga ombangi yoku misa. Ekopo liange lia ñatukila, li lekisa okuti ndukuakandu.

⁹ Wa suyulula lonyeño yaye kuenje wa suvuka. Wa ñanyula lovayo aye. Unyãli wange wa mekulula lovaso aye.

¹⁰ Omanu va ngasamaila lovimẽla viavo. Va matula ovikusi ketama. Va liñongiliya.

¹¹ Suku o ngeca ku vakueviho, kuenje o njimba povaka a vakuakandu.

¹² Nda kaile ciwa kuenje eye wa nyanyõla, Wa ñuata kosingo, kuenje wa neya neya. Wa ñapa ndocimãho caye,

¹³ kuenje vakualohonji vaye va ñuala. O tola olongela viange kuenje ka kuete ohenda. Ondulu yange o yi pesila posi.

¹⁴ O ngasasa ongase kongase. O ñatukila ndesualali.

¹⁵ Nda tongela ocikelẽi kekova liange. Longusu yange nda yi kapa voneketela.

¹⁶ Ocipala cange ca pongoloka loku lila, lovisokopia viange via vuvala,

¹⁷ ndaño ovaka ange ka a lingile cimue civi, kuenje olohutililo viange vi yela.

¹⁸ Angongo, ku ka tuvike osonde yange. Okuliyula kuange ka ku ka kale lepuyuko.

¹⁹ Tala, ndaño cilo ombangi yange yi kasi kilu. U o njimbila uvangi o kasi kilu.

²⁰ Akamba vange va fuanguila. Ovaso ange a loluila asuẽlela kovaso a Suku,

²¹ okuti ombangi yange yi livondelela ku Suku ovina viomunu, ndeci omunu a livondelela u a lisungue laye.

²² Momo kovaso yanyamo añamiñami ngenda lonjila yimue kuenje si tiuka layo.