YOVI 15 - Embimbiliya - Bíblia Sagrada em Umbundu

¹ Oco Elifasi u Temani wa kumbulula hati,

² Omunu ukualondunge oku kumbulula lolondunge viofela loku liyukisa ofela yokutundilo, oco he, ciwa?

³ Omunu oku likumbolola lolondaka viesanda, ciwa ale? Omunu oku popia ño evi ka vi kuatisa, ca posoka ale?

⁴ Puãi ove o kasi loku nyõla esumbilo lioku sumbila Suku, o kasivo loku tateka efendelo lioku fendela Suku.

⁵ Momo olohole viove vi longisa omẽla wove. Wa nola upopi wa vakuatutu.

⁶ Omẽla wove wa ku pisa, ame hameko, Olondaka viomẽla wove vi ku veta evelo.

⁷ Ove nga, pokati komanu, ove wa livanga oku citiwa? Ove nga wa livanga okuti olomunda via siala konyima?

⁸ Ove wa kala vonjango ya Suku? Wa sima okuti ove lika o kasi lolondunge?

⁹ Ove wa kũlĩha nye okuti etu ka tua ci kulĩhĩle? Eci ca ku lomboloka okuti etu ka ca tu lombolokele, oco nye?

¹⁰ Pokati ketu pali vakuawele kuenda akongo. Va kuka ca velapo, isiove o sule.

¹¹ Olondaka via Suku vioku lembeleka hẽ ka vi ku tẽla? pamue olondaka vietu viomboka hẽ wa vi pukula?

¹² Utima wove wa ku pokuisila nye, lovaso ove a ku liaña ndati

¹³ okuti utima wove wa ñualelapo Suku lolondaka ndevi vi tunda vomẽla wove?

¹⁴ Omunu hẽ nye okuti o tẽla oku yela? U wa citiwa lukãi o tẽla ndati oku linga ukuesunga?

¹⁵ Tala, Suku ka kolela ndaño vaye va kola. Ndaño ovailu ka a yeli kokuaye,

¹⁶ oco hẽ, siti ca piãla enene omunu ukuombondo, haeye wa vĩha omo a nyua nyua evĩho ndovava.

¹⁷ Ame hu lekisa, njevelele.

¹⁸ Olonoño via ci sapula. Eci ca tunda ku vaisiavo ka via ci sitikile

¹⁹ Ofeka ya ihĩwa kokuavo lika liavo, kuenje lomue ukualofeka wa pita pokati kavo.

²⁰ Ukuevĩho o sakalala lolongembia oloneke viaye viosi. Ongangala yi suvala anyamo ayo osi.

²¹ O yeva yeva evi viu yokokisa. Pokati kokusalala ocinyoi ciya kokuaye.

²² Eye ka lavoka oku puluka kohali. Efulilo liaye oku pondiwa losipata.

²³ O tungayala oku vanjiliya okulia hati, Ku kasi pi? Wa kulĩha okuti eteke liowelema liu tayilili.

²⁴ Ohali longongo viu linga ndosoma ya malehela ocilunga okuti viu yokokisa kuenje viu yula.

²⁵ Omo woluila Suku eka liaye kuenje wa vayela Tõlo

²⁶ poku u kuatela umbinde loku u katukila lotevele ya pama,

²⁷ lomo komuenyo waye welau kua tunda okuneta katama ndaño ketimba liosi,

²⁸ oco o tunga valunda, kuenje o kala volonjo ka mu sesamela omunu, haivio via tukuiwila oku nyolẽha.

²⁹ Ka lingi ohuasi, ukuasi waye ka u tumala. Olombombo viaye ka vi tuamẽla posi.

³⁰ Eye ka puluka kohali. Ulienge u kakula ovinjovelela viaye lepako liaye li nyolẽha lofela.

³¹ Ka ka kolele evi viesanda, momo nda oco o likemba eye muẽle kuenje viesanda ovio vi linga onima yaye.

³² Eye o nyolẽha osimbu otembo yaye ka yeyile. O nyõleha tupu ovianja viaye ka vi talala.

³³ O tuñunya epako liaye liowisu ndeci uyuva, o lalula olonẽlẽho viaye ndeci oliveira.

³⁴ Momo vakuakulikala Suku va linga olosiũle, londalu yi lia olonjo viava va ecaeca ovitukiko.

³⁵ Va mina evĩho, va cita ohali. Vovitima viavo va so vola elimbi.