YOVI 14 - Embimbiliya - Bíblia Sagrada em Umbundu

¹ Omunu wa citiwa lukãi ukualoneke viñamiñami, haiye we yuka lohali.

² O telẽha kuenje uvuka. O tila ndulembo, ka tumãla.

³ Ove o patuluila ovaso ove umue ndeye okuti o nena ame kekanga liove?

⁴ Helie o tẽla oku upa ocina ca yela kocikuata ca liña? Lomue o ci tẽla.

⁵ Omo oloneke viaye via tukuiwa, lokutenda kuolosãi viaye ku kasi love, kuenje ove wo sokiyila ongave ka yi pitahãliwa,

⁶ oco pukukila kuiñi, liwekako oku u vanja, okuti eye o sanjukila eteke liaye ndondingupange.

⁷ Momo nda uti u timbuiwa kuli elavoko okuti u yova vali. Kuli muẽle elavoko okuti ko liweka ovinjovelela.

⁸ Ndaño olumbombo luawo lu kukila posi kuenje ocisingi cawo ci kukutila vongongo,

⁹ haimo, nda u sanga ovava u yova vali, kuenje kuiya ovisapa ndeci kocikũla cokaliye.

¹⁰ Puãi omunu o fa, kuenje o puako. Omunu o tula omuenyo kuenje o kasi pi?

¹¹ Ndeci ovava ovociva a takata, pamue ndeci olui lu tepuluka kuenje lu kotoka,

¹² haico omunu a pekela kuenje ka pasuka vali. Ka pinduka muẽle kotulo, toke ovailu a imũha.

¹³ Nda wa tavele oku mbundisa vonjembo! Nda wa tavele oku mbundisa toke onyeño yove yimũha! Nda wa tavele oku nukuila eteke loku njivaluka!

¹⁴ Omunu nda o fa o kala vali lomuenyo? Momo nda oco nda nda talamela ño oloneke viosi viomuenyo wange toke mbilikiyiwa,

¹⁵ kuenje nda wa mbilikiya, lame nda nda ku kumbulula. Nda oco, ove nda wa kuatela upange wovaka ove ongeva.

¹⁶ Puãi cilo wendiliya okuenda kuange, o vanja vanja ño kakandu ange.

¹⁷ Olongole viange vi kutilua vocipete, lakandu ange a manelua vombia.

¹⁸ Omo ndeci omunda yi kupuka kuenje yi nyanyõha, ndeci ewe li sondoluiwa,

¹⁹ ndeci ovava a sielenisa ovawe, kuenda ndeci andunde ambata osi, haico ove o nyõla elavoko liomunu.

²⁰ Olonjanja viosi ove u yula kuenje eye enda. O pongolola ocipala caye kuenje o weca.

²¹ Omãla vaye valume va kemãla eye puãi ka ci. Va kutisua osõi, eye puãi ka ci limbuka.

²² O yeva lika olongembia viovetimba liaye muẽle. O lisiõsuĩla eye muẽle lika.