YOVI 12 - Embimbiliya - Bíblia Sagrada em Umbundu

¹ Oco Yovi wa kumbulula hati,

² Ocili, ene lika vumanu. Eci vu fa olondunge vi fila kumue lene.

³ Puãi lamevo ñuete olondunge, heneko lika. Ame si sule okuti ene wa velipo. Helie ka kũlĩha ovina ndevi?

⁴ Ame ndicisepeleyi pokati kakamba vange. Ame ndukuakuvilakaya Suku loku kumbuluiwa laye, haime ndukuesunga loku pua eko, ame nda linga ocisepeleyi.

⁵ U o kasi ciwa o yola epembe ohali. Ohali yi taiyilili u endela apa pa sielena.

⁶ Olonjo via vakuakupunda vi kasi lelau, lava va vayela Suku loku fendela unene wavo nda suku, ovo va kolapo.

⁷ Puãi puli kovinyama kuenje viu longisi. Puli kolonjila viokilu kuenje viu sapuili.

⁸ Puli kovikũla viongongo kuenje viu longisi. Puli kolosi viokalunga kuenje viu lomboluili.

⁹ Pokati kavio viosi vipi ka via kũlĩhile okuti eka lia Yehova lia ci linga?

¹⁰ Omuenyo wocendalomuenyo cosi u kasi peka liaye, ndaño efuimo liomanu vosi.

¹¹ Etuĩ hẽ ka li seteka olondaka ndeci uliakusu u mãha okulia?

¹² Olondunge vi kasi lakongo, lukũlĩhĩso wiya lokulua kuoloneke.

¹³ Suku o kasi lolondunge kuenda unene. Alungulo aye ocili. Ovina viosi viu lomboloka.

¹⁴ Nda o tungulula, lomue o tela oku ci tunga vali. Nda o yika omunu, lomue o tẽla oku u yikulula.

¹⁵ Nda uvika ovava, osi yi kukuta. Nda eca ovava alua, osi yi nyoleha.

¹⁶ Eye o kuete olohõlo lolondunge. U wa liañiwa lu wa liaña vosi vaye.

¹⁷ Akulu vofeka o va nyeha olondunge, lolonganji o vi lingisa aveke.

¹⁸ Eye upa uwale wolosoma, kuenje o va iña akuamo.

¹⁹ Ovitunda o vi endisa olomãi viaño, kuenje o kundula vakuonene.

²⁰ Eye uhisa olondaka viava va kolelua, haiye upa olondunge kakulu.

²¹ Eye asa epembe olombuale, kuenje o lulumisa vakualohõlo.

²² O nena kutanya ahãla avi. O situlula ahãla a tumbiwa uyombeki.

²³ O luisa olofeka haeye o vi nyõla. Amisa olongave viofeka, lomanu vaco o va tuala umandekua.

²⁴ Eye upa ukũlĩhĩso kasongui vomanu vofeka. O va tungayaisa vekalasoko omu ka muli onjila.

²⁵ Va papayataila vowelema, ocinyi ka va kuete. O va yengengisa ndoloholua.