YOVI 11 - Embimbiliya - Bíblia Sagrada em Umbundu

¹ Oco Cofare u Nomati, wa kumbulula hati,

² Olondaka viakahandangala hẽ ka vi sesamela ekumbululo? Omunu o popia ño viumamõhe hẽ, o yovoka?

³ Umãmõhe wove hẽ uhisa omanu? Eci o fuangula hẽ lomue o ku kutisa osõi?

⁴ Momo ove wa popia huti, Ovisimilo viange vi yela. Nda yela kovaso a Suku.—

⁵ Puãi, nda ca tavele okuti Suku o popia! Nda ca tavele okuti Suku o vangula love

⁶ loku ku lomboluila alumbu olondunge viaye! Momo ovina viosi vio lomboloka. Kulĩha okuti eci Suku a ku kisika ci sule, eci ca sesamela ongole yove oco ca lua.

⁷ Ove hẽ o tẽla oku kũlihĩsa ovina via longa via Suku? Otẽla oku kũlĩha okusuapo kuokukola kua Tõlo?

⁸ Koku lepa okukola kua Tõlo kua pitãhãla ovailu. Ove o tẽla oku linga nye? Koku longa okukola kua Tõlo kua pitãhãla onjembo. Ove o tẽla oku kũlĩha nye?

⁹ Oseteko yakuo yisõvi, yokilu lieve yimbumbũlu. Upati wakuo wa lua, wokalunga u sule.

¹⁰ Nda eye o pita loku kuata, kuenje o yala ekanga, helie u tateka?

¹¹ Momo eye o limbuka omanu okuti ka va silivila. Eci a mõla evĩho eye he ka li moñolola?

¹² Eci ocimbulu covusenge ci cita omunu oco eveke li kuata olondunge.

¹³ Nda o sunguluisa utima wove o woluĩla ovaka.

¹⁴ Nda ũvi u kasi peka liove, wimba kupãla love. Ku ka tave okuti evĩho li tunga vonjo yove.

¹⁵ Nda oco o linga o petuka kuenje o pua osõi. Otumãla loku koka, ku kuata vali usumba.

¹⁶ Wivala ohali yove. Kokuove yi kala ndovava a pitale.

¹⁷ Kuenje omuenyo wove u tua, ekumbi pongunji li sule. Owelema wawo u linga ndomele.

¹⁸ O kala ciwa momo o kuete elavoko. Ovindikiyiwa kuenje o pekela loku koka.

¹⁹ O pekela ciwa kuenje lomue o ku lingisa usumba. Va lua va ku pinga pinga oku va kuatisa.

²⁰ Puãi ovaso a vakuevĩho a vuvala. Onjila yoku puluka ka va moli. Elavoko liavo oku tula omuenyo.