YOVI 10 - Embimbiliya - Bíblia Sagrada em Umbundu

¹ Nda nyehula omuenyo wange. Ndombolola kutanya okulisiõsiõla kuange. Omo vutima mua sanyelelua oco mopia.

² Mopia la Suku siti, Ku ka mise. Ndomboluile eci o njakisila.

³ Kokuove hẽ oku kangisa, pamue oku sepula upange wovaka ove, oco esunga ale? Kokuove hẽ oku kuatela ahãla a vakuevĩho ocame, oco esunga?

⁴ Ove hẽ, o kuete ovaso ndovaso omunu? O lete ndeci omunu a lete?

⁵ Oloneke viove hẽ via soka ndoloneke viomunu, pamue anyamo ove ndanyamo omunu,

⁶ okuti o moñolola evĩho liange, loku vanjiliya ekandu liange,

⁷ ndaño wa kulĩha okuti siukuevĩhoko, kuenda okuti ka kuli umue o tẽla oku popela peka liove?

⁸ Ove, ovaka ove muẽle a sovola, hao a nunga, cilo puãi wa ñualapo oku nyõla.

⁹ Ivaluka okuti wa sovola leve. O niula vali keve?

¹⁰ Haveko wa njitila ndasenjele loku ñolisa ndongundi?

¹¹ Ove muẽle wa mbualisa ositu lekova haive wa nokekisa lakepa lasipa.

¹² Ove wa nyiha omuenyo loku ndinga ohenda. Utate wove wa tekula utima wange.

¹³ Haimo ovina wa vundisa vutima wove, haivio ocipango cove, vievi:

¹⁴ Nda ndinga ekandu ove o ndimbuka, kuenje ku njovuisa kevĩho liange.

¹⁵ Nda ndukuevĩho, ngongo yange! Nda ndukuesunga si petula utue omo nda kutisua osõi. Ndi sokolola ohali yange.

¹⁶ Nda mbotoka ove o mbanjiliya ndeci va vanjiliya ohosi, o ndingila vali ovikomo, ovikomo viaco puãi vioku kangisa.

¹⁷ O vokiya olombangi vi misa, lonyeño yove yoku nemela layovo yi vokiyiwa. O muisa muisa ño-o ohali.

¹⁸ Wa nundisila nye vimo lia mãi? Nda nda file osimbu lalimue iso lia mõla!

¹⁹ Nda ca kaile okuti sia la kala lomuenyo! Nda ndopiwile vimo oku tualiwa keyambo!

²⁰ Oloneke viomuenyo wange haviñamiñamiko hẽ? Nunde okuti ndembelekua naito

²¹ osimbu sia endele oko si tiuka, okuti kofeka yowelema haiyo yundembo wokufa.

²² Ofeka yaco ofeka yowelema wosito. Ndaño ocinyi ci kasimo ca linga owelema.