YOVI 1 - Embimbiliya - Bíblia Sagrada em Umbundu

¹ Vofeka ya Uci mua kala ulume onduko yaye Yovi. Omunu waco wa pua etondelo haeye ukuesunga, wa sumba Suku kuenje wa suvuka evĩho.

² Eye wa cita omãla valume epanduvali lomãla vakãi vatatu.

³ Wa kala lolohũlũkãi epanduvali violomeme, lolohũlũkãi vitatu violongamelo, lolokanga violongombe ovita vitãlo, kuenda olomange viovimbulu, ovita vitãlo, lapika ka va tendiwa. Oco omunu waco wa velapo, okuti omanu vosi vakuavo vokutundilo va sule.

⁴ Omãla vaye valume va liendaila kolonjo viavo, vosi va lingainga ovipito, u leteke liaye, u leteke liaye, kuenje va tuma oku laleka vamukãi vavo oku lia loku nyua lavo.

⁵ Eci oloneke viovipito via pua, oco Yovi wa tuma oku va piolisa. Oku pasuka ociteketeke, wa va lumbaila ovilumba vioku yoka, omõla ocilumba, omõla ocilumba, momo Yovi hati, Sanga omãla vange va linga ekandu kuenje va simãila Suku cimue cĩvi vovitima viavo. Oco Yovi a lingainga.

⁶ Eteke limue omãla va Suku veya oku lilekisa ku Yehova, Satana weyavo kumosi lavo.

⁷ Yehova wa pula Satana hati, O tunda pi? Satana wa kumbulula Yehova, hati, Nda tunda koku tungayala kilu lieve loku ñuala ñualako.

⁸ Oco Yehova wa popia la Satana hati, Wa limbuka ukuenje wange Yovi okuti kilu lieve ka kuli ukuavo wa lisoka laye, okuti omunu wa pua etondelo, haeye ukuesunga, o sumba Suku, kuenje o suvuka evĩho?

⁹ Satana wa kumbulula Yehova hati, Yovi hẽ, wa ku sumbila ño ocali, ove u Suku?

¹⁰ Haveko hẽ wo vindikiya kolonele viosi oku vindikiya onjo yaye la cosi a kuete? Wa sumũluisa upange wovaka aye, kuenje ovipako viaye via lua vofeka.

¹¹ Puãi imba eka liove okuti o lamba cosi a kuete kuenje eye o ku likalela kovaso ove.

¹² Kuenje Yehova wa popia la Satana hati, Tala, cosi Yovi a kuete ove o kuete laco omoko, puãi eye muẽle ku ko lambe, Oco Satana wa tunda ku Yehova.

¹³ Eteke limue eci omãla va Yovi valume lomãla vaye vakãi va kala oku lila loku nyuila ovinyu vonjo ya kota liavo,

¹⁴ oco omunga yeya ku Yovi hati, Olongombe via kala loku lima, lovimbulu via lila ocipepi lavio,

¹⁵ kuenje va Seva veya, va vi punda. Va ipa akuenje losipata, ame lika liange nda puluka yu ndeya oku ku ci sapuila.

¹⁶ Eci u a kala loku popia oco kueya ukuavo hati, Ondalu ya Suku ya tunda kilu kuenje ya yoka olomeme kuenda akuenje, ya lia muẽle, ame lika liange nda puluka yu ndeya oku ku ci sapuila.

¹⁷ Osimbu u a kala loku popia, oco kueya ukuavo hati, Va Kaldea va linga olohoka vitatu, va ñuala olongamelo kuenje va vi kuata, va ponda akuenje losipata, ame lika liange nda puluka yu ndeya oku ku ci sapuila.

¹⁸ Osimbu u a kala loku popia, oco kueya ukuavo hati, Omãla vove valume lomãla vove vakãi va kala oku lila loku nyuila ovinyu vonjo ya kota liavo,

¹⁹ kuenje tala, kueya ocipepe ca tunda vekalasoko, ca teya avindi akuãla onjo, onjo yolumuhĩla omãla kuenje va fa. Ame lika liange nda puluka yu ndeya oku ku ci sapuila.

²⁰ Yovi wa votoka, wa tola onanga yaye kuenje wa lipemũla utue. Wa limba posi kuenje wa fendela.

²¹ Wa popia hati, Epõlõla nda tunda lalio vimo lia mãi hailio niukila lalio. Yehova wa eca, Yehova haeye wa tambula vali. Onduko ya Yehova yi sivayiwe.

²² Kovina evi viosi Yovi ka lingile ekandu, ndaño oku vela Suku.