YONA 4 - Embimbiliya - Bíblia Sagrada em Umbundu

¹ Eci puãi ca sumuisa Yona kuenje wa tema calua.

² Oco wa likutilila ku Yehova, hati, A Yehova, eci hẽ, hacoko nda popele eci nda kala vofeka yetu? Siti oco nda yayuilako oku tilila ko Tarsisi momo nda ci kũlĩha okuti ove u Suku ukuacali, ukuahenda, ukuakulivala konyeño, ukuacisola ka ci pongoloka, haive ukuangecelo.

³ Cilo hu pinga, a Yehova, njupe omuenyo wange momo ca mbelelapo oku fa, oku kala lomuenyo ci sule.

⁴ Kuenje Yehova wo tambulula, hati, Okutema kuove kua sunguluka?

⁵ Oco Yona wa tunda vimbo, wa tumãla konẽle yutundilo wimbo. Wa litungila osinge, omo a tumãla vulembo wayo, hã ha mõli eci ci lingiwa limbo.

⁶ Kuenje Yehova Suku wa kũlisa olungu ha lu eci undembo kutue wa Yona oco a kale ciwa. Yona wa lu sanjukila calua.

⁷ Puãi eci kua ca omẽle Yehova wa tuma epuka lia teta olungu kuenje lua kukuta.

⁸ Eci ekumbi lia tunda oco Yehova wa tuma ofela lowuya walua, kuenje utanya wa veta kutue wa Yona; yu wambuka, kuenje wa livela lutima waye wosi oku fa, hati, Ca mbelelapo oku fa, oku kala lomuenyo, ci sule.

⁹ Kuenje Yehova wa popia la Yona, hati, Oco hẽ, ca sunguluka oku tema mekonda liolungu? Eye hati, Ca sunguluka muẽle oku tema, ndaño oku livela okufa.

¹⁰ Oco Yehova wa popia laye hati, Wa sumũila olungu lima kua talavayele ndaño oku lu tata, olungu lua kula vuteke kuenje vuteke haimo lua kukuta.

¹¹ Oco hẽ, ame si kuatela ohenda imbo linene lia Ninivei, muna mũli ocita lakui avali kolohũlũkãi viomanu via supa, haivo ka va kũlĩhĩle oku tepisa eka liondio leka liepĩli, kuenda mũlĩvo ovinyama vialua?