YONA 2 - Embimbiliya - Bíblia Sagrada em Umbundu

¹ Osimbu a kala vimo liolusi oco Yona a likutilila ku Yehova, Suku yaye,

² hati, Kohali yange nda vilikiya ku Yehova, kuenje eye wa nambulula. Nda liyeyela valondo onjembo, kuenje wa njeva.

³ Ove wa njimba pelondo vokati kokalunga, kuenje olusipa lua ñuala. Akimba ove osi, lapuku, a pita kilu liange.

⁴ Oco nda popia siti, Nda takumuĩwa kokuove. Mõla vali ndati onembele yove yi kola?

⁵ Ovava a ñuala loku sipata. Okalunga ka ñuala ocingonja. Ovitangitangi via nanga kutue.

⁶ Nda vomba toke kafetikilo olomunda. Nda pitila vofeka yimue omo nda yikiwila lovisingo otembo ka yi pui. Puãi ove wa njupa vonjembo, a Yehova, a Suku yange.

⁷ Eci utima wa hongua vokati kange oco nda ivaluka Yehova. Elombelo liange lia pitila kokuove vonembele yove yi kola.

⁸ Ava va sumbila ovina viaño viuhembi va sia ocikolo cavo cocili.

⁹ Ame puãi hu lumbila ocilumba colopandu via lua. Eci nda likuminya oco ndinga. Oku popela ku tunda ku Yehova.

¹⁰ Oco Yehova wa popia lolusi kuenje lua sanjela Yona kongongo.