YOELI 3 - Embimbiliya - Bíblia Sagrada em Umbundu

¹ Momo tala, koloneke viaco kuenda kotembo yaco, eci numbulula vali okusalala kua Yuda, kuenda kua Yerusalãi,

² oco ngongolola vakualofeka vosi. Ndi va lowisila vocimbota ca Yehosiafata, kuenje omo ndi va sombisila mekonda liomanu vange, haivo ocipiñalo cange Isareli, momo va va sanduila pokati kolofeka kuenje va litepela ofeka yange.

³ Va imbila omanu vange ocela. Va eca okokuenje ha va tambula ocipuepue. Va landisa okofeko lovinyu ha va nyui.

⁴ A Turo, a Sidono, avaimbo osi a va Filisiti, Nye vu yongola kokuange? Vu kasi loku fetuluinyila cimue ale? Nda oco vu kasi loku ndinga limbuki okuti efetuluinyo liaco ndu li fetuluinyi lonjanga.

⁵ Momo wambati opalata yange lulu wange, kuenda evi viange via posoka ndi vi sole wa vi kapi volonembele viene.

⁶ Wa landisi va Yuda la va Yerusalãi ku va Helasi ho va sanduila kupãla lofeka yavo.

⁷ Cilo puãi ndi vopa kuna wa va landisili kuenje elinga liaco liene ndu li fetuluinyi lonjanga.

⁸ Ndi landisa omãla vene valume lomãla vene vakãi peka lia va Yuda, kuenje ovo va va landisa ku va Seva, kofeka yocipãla, momo Yehova wa popia.

⁹ Imbi oluiya pokati kolofeka. Kolisi ovita. Votoli asualali. Alume vosi vakuavita veye, va wile vonjila.

¹⁰ Teli atemo ene ha a lingi olosipata, kuenda olomila viene ha vi lingi olonjelia. U wa leñela a popie hati, Nda pama.

¹¹ A vakualofeka viosi, yayuliko, kokeli. Ongolokeli pamosi. A Yehova, nena olohoka viove.

¹² Olofeka vi votoke, viye kocimbota ca Yehosafata, momo oko numãla hã si tetuluila olofeka viosi via ñuala.

¹³ Iñisi omĩla momo ovapia a yela. Iñili. Kosi. Momo ocikoselo ce yuka. Ovikuata viaco vi supoka momo avĩho avo a lua.

¹⁴ Awiñi a lua! Awiñi a lua vocimbota coku tetuluila! Momo eteke lia Yehova lio liya kocimbota coku tetuluila.

¹⁵ Ekumbi losãi vi tekãva, kuenda olombungululu ka vi eci vali ocinyi.

¹⁶ Yehova o vilikiya ko Siono, haiye o yevalisila ondaka yaye ko Yerusalãi, kuenje ilu longongo vi lisenga. Puãi Yehova o lingila omanu vaye ocikolo, o linga ombonge yomãla va Isareli.

¹⁷ Oco vu kũlĩha okuti ame Yehova, ame Suku yene, haime nda tunga vomunda yange yi kola Siono. Kuenje Yerusalãi li linga imbo li kola. Vakualofeka lalimue vali eteke va pitamo.

¹⁸ Eteke liaco volomunda mu loka ovinyu vi sõsa, kuenda koviwulu ku pita asenjele. Olondui viosi via Yuda vi yuka ovava. Konjo ya Yehova ku tunda ono yi tapela ocimbota ca Sitimi.

¹⁹ Egito li linga elunda, kuenda Edome li linga ekalasoko, mekonda liovina vĩvi va lingainga komãla va Yuda, momo va pesela osonde yava ve lipua vofeka yavo.

²⁰ Yuda puãi o tumãla ño-o hũ, haico Yerusalãi, tunde kocitumbulukila toke kocitumbulukila.

²¹ Osonde yavo ndi yi fetuluinya, lava va pia layo si va yovuisa, momo Yehova wa tumãla vo Siono.