YOELI 2 - Embimbiliya - Bíblia Sagrada em Umbundu

¹ Siki olumbeta vo Siono. Imbili oluiya komunda yange yi kola. Olonungi viosi viofeka vi lulume omo eteke lia Yehova li li oku iya, li kasi muẽle ocipepi.

² Eteke liaco eteke liowelema kuenda esumuo, hailio eteke lialende lowelema walua. Kuiya omanu va pama haivo vakahandangala. Va molẽha kolomunda ndolohuma. Tunde kosimbu ka kua la kala omanu ndovo, ndaño kovaso yanyamo ka ku kala, ndaño kovitumbulukila viya ka ku kala.

³ Kovaso yavo ondalu yi yoka. Konyima yavo ulienge u kakula. Kovaso yavo ofeka ya soka ndocumbo ce Edene. Konyima yavo puãi ya soka ndekango. Ka va si cimue.

⁴ Va mõlẽha ndotuvalu, va lupuka ndotuvalu tuovita.

⁵ Ndeci ci yevala onjuvungo yakãlu ovita, pamue okuõla kuovilienge viondalu yi lia ovinene vovapia otiliku, haico ci yevala okulupuka kuavo kolomunda. Veya ndolohoka via pama via malẽhẽla oku yaka.

⁶ Omanu vosi va va lulumila, lovipala vi pongoloka lusumba.

⁷ Va yoloka lutoi ha va yaki. Va londa ovimbaka ndava va pama kovita. Vamako, u vonjila yaye, u vonjila yaye, lomue o pambuka vonjila yaye.

⁸ Lomue o lipungika lukuavo; omunu omunu amako vohoka yaye. Va papula olohoka viovanyãli, ka va talama.

⁹ Va pitila vimbo, va somboka lolupesi ovimbaka. Va iñila volonjo, va iñilĩla polonjanela ndovimunu.

¹⁰ Kovaso yavo ongongo yi luluma, lilu li lisenga. Ekumbi losãi vi tekãva, kuenda olombungululu vi liweka oku tua.

¹¹ Yehova o vilikiya lolukandi kolohoka viaye, momo olohoka viaye via lua cimue. Lu o linga ocipango caye wa pama ca lua. Momo eteke lia Yehova linene, kuenda li linga usumba. Helie o li tẽla?

¹² Puãi, ndaño cilo, lopo Yehova o li loku laleka, hati, Pongolokeli kokuange lutima wosi, loku likandangiya okulia, loku lila kuenda oku litetela.

¹³ Ko ka toli vali olonanga, toli puãi itima. Pongolokeli ku Yehova, Suku yene, momo eye ukuahenda haeye ukuacikembe, o livala konyeño, otembo yosi o kasi locisola ka ci pongoloka, kuenda kocisimĩlo coku nyõla o liwekako.

¹⁴ Helie wa kũlĩha nda hẽ eye ka tiukako loku pongoloka, loku tu sila esumũlũho limue okuti tu lumbila vali Yehova Suku yetu ovilumba viokulia levi viokunyua?

¹⁵ Siki olumbeta vo Siono. Tukuli eteke limue ha li lingi eteke li kola lioku likandangiya okulia. Laleki ohongele yoku fendela.

¹⁶ Ongololi omanu. Kolisi ongongela. Ongololi olosekulu lomãla, ndaño oloñaña. Sandombua la Ndombua va tunde kohondo yavo.

¹⁷ Ovitunda via Yehova, vina vi vumba vumba, vi lilile pokati kocindumba lutala, viti, A Yehova, supisapo omanu vove. Ku ka muise epembe ocipiñalo cove okuti vakualofeka va ci fuanguila. Vakualofeka va popela nye vati, Suku yavo o kasi pi?

¹⁸ Oco Yehova wa ivaluka ofeka yaye, wa kuatela omanu vaye ohenda.

¹⁹ Yehova wa kumbulula omanu vaye, hati, Ndu muisi otiliku lovinyu kuenda ulela, kuenje cu lingili epuiti. Si tava vali okuti vu pembuiwa la vakualofeka.

²⁰ Ava va tunda konano ndi vopa kokuene ha va endi kupãla. Ndi va lupuisila kofeka yekango ka kuli omanu. Olohoka viavo vi kasi kovaso vi taka vokalunga ka kasi kutundilo. Lolohoka viavo vi kasi konyima vi taka vokalunga ka kasi kutakelo. Kuenje elemba liavo lĩvi li yevala, omo va linga ovina vinene.

²¹ Afeka, ku ka yokoke. Yolela. Sanjuka. Momo Yehova wa linga ovikomo.

²² Avinyama viovusenge, ko ka kuati usumba, momo ovililo viovekalasoko vi yova. Oviti vima apako avio, kuenda uyuva lukuyu vi eca epako lialua.

²³ Lene, amãla va Siono, yoleli. Sanjukili Yehova Suku yene. Momo eye wo wihi ombela yohalula ho tekuli. Wo lokisili ombela yocili, okuti lolombela viomandavela levi via sulako, viosi wa vi lokisa ndeci a lingainga ale.

²⁴ Ovimbandi vi yuka otiliku, loviyongelo vi supoka lovinyu lulela.

²⁵ Ndu piñainyalipo alima ana a liwa lolohoka viange yiokuti, olohuma lavõle lapange lapolovi nda tuma kokuene.

²⁶ Vu lia ca liwewa ho kuta. Vu sivaya onduko ya Yehova Suku yene, una wo lingili ovikomo. Omanu vange ka va kutisiwa vali osõi.

²⁷ Vu kũlĩha okuti ame ñasi pokati ka va Isareli. Vu kũlĩhãvo okuti ame Yehova ame Suku yene, ka kuli ukuavo. Omanu vange lalimue vali eteke va kutisiwa osõi.

²⁸ Kuenje noke ciya okuti ndi sukumũila Espiritu liange komanu vosi. Omãla vene valume lomãla vene vakãi va imba owanji; olosekulu viene vi lota olonjoi, lamãlẽhe vene va mõla ovinjoinjoi.

²⁹ Koloneke viaco ndaño kakuenje lokafeko vakuopange ndi sukumũila Espiritu liange.

³⁰ Kilu kuenda posi ndekisa olondimbukiso viosonde londalu lolongunji viowisi.

³¹ Ekumbi li pongoloka owelema, losãi yi pongoloka osonde osimbu eteke linene lia Yehova, hailio li yokokisa, ka lieyile.

³² Kuenje vosi va tukula onduko ya Yehova va popeliwa. Momo vomunda Siono kuenda vo Yerusalãi mu kala ava va popeliwa, ndeci Yehova a popia. Pokati kava va popeliwa pa kala ava va kovongiwa la Yehova.