YOELI 1 - Embimbiliya - Bíblia Sagrada em Umbundu

¹ Ondaka ya Yehova yeya ku Yoeli, omõla a Petueli, yiti,

² Yeveleli, akulu. Lene alonungi viofeka, yeveleli! Koloneke viene, pamue koloneke violosekulu viene, kua la pita hẽ cimue ndoco?

³ Ci lomboluili omãla vene, lovo va ci lomboluile komãla vavo, lomãla vavo kocitumbulukila cikuavo.

⁴ Eci ca supa koku liwa levõle, epange lia ci lia. Eci ca supa koku liwa lepange, oluhuma lua ci lia. Kuenje eci ca supa koku liwa loluhuma, epolovi lia ci lia.

⁵ Pasuki, aloholua, lili. Ene vosi vu nyuanyua ovinyu, lisiõsiõli, momo ovinyu viokaliye via pua vovimẽla viene.

⁶ Momo vakuafeka yinene, omanu vayo ka va tendiwa, va iñila vofeka yange. Ovayo avo a soka ndovayo ohosi, lolombanjo viavo ndevi viomange yohosi.

⁷ Va nyõla pe uyuva wange, lukuyu wange vo vuyula olonjula. Vo vuyula wosi kuenje vo kupuila posi; ovinjovelela viawo via yeluluka.

⁸ Lisiõsiõli ndufeko wa wala ocikelei omo a fisa ukuenje waye.

⁹ Ocilumba cosema kuenda ocilumba cokunyua, via imũhila vonjo ya Yehova. Ovitunda vi vumba vumba Yehova via sumua.

¹⁰ Ovapia a nyõlẽha, lofeka ya suvala. Momo otiliku ya nyõlẽha, layuva a kukuta, kuenda ulela wa kambela.

¹¹ Alongunja, nyumãli. A vakuaviumbo, liteteli. Lisiõsũili otiliku losevata, momo elombolo liovapia lia nyõlẽha.

¹² Ayuva a kukuta; akuyu ovuka; oromeira layovo kuenda eva la macieira. Oviti viosi viovusenge via kukuta. Pokati komanu esanju ka pali.

¹³ Avitunda, wali ovikelei loku lisiõsiõla. Leñi, leñi, ene vu vumba vumba kutala. A vakuakuvumba Suku yange, iñilivonembele. Wali ovikelẽi. Lalimo uteke wosi. Momo ocilumba cosema kuenda ocilum cokunyua via imũhĩla vonjo ya Suku yene.

¹⁴ Kolisi oloneke vioku likandangiya okulia. Laleki ohongele. Ongoluili akulu lolonungi viosi viofeka vonjo ya Yehova Suku yene. Vilikiyi Yehova.

¹⁵ Eteke liaco we! Momo eteke lia Yehova li kasi ocipepi, liya ndenyõlẽho li tunda ku Tõlo.

¹⁶ Eteku nga ka lia imũhĩle kovaso etu? Lesanju lonjolela ka via imũhĩle vonjo ya Suku yetu?

¹⁷ Ombuto ya volela vovipanga, lolosila via nyõlẽha. Olonjo vioku soleka via papuluka, momo otiliku ya nyõlẽha.

¹⁸ Okuleñaleña kuovinyama kua kãla. Olongombe vi lila lila ca lua, momo apa vi litekuila ka pali. Ndaño oviunda violomeme vi kasi loku nyõlẽha.

¹⁹ Kokuove, oko mbilikiya, a Yehova, momo ondalu ya lia ovililo viokekalasoko, kuenda ovilienge via yoka oviti viosi viovusenge.

²⁰ Ndaño ovinyama viovusenge vi vilikiya kokuove, momo olondui via kukuta, kuenda ondalu ya nyõla ovililo viokekalasoko.