YOANO 9 - Embimbiliya - Bíblia Sagrada em Umbundu

¹ Eci a vinjukako wa mola omunu wa citiwa omeke.

² Olondonge viaye vio pula viti, A Rambei, helie wa linga ekandu, omunu u, ale, ele olonjali viaye, okuti o citiwa omeke?

³ Yesu wa kumbulula hati, Ka ci kasi okuti eye wa linga ekandu, pamue olonjali viaye, puãi wa citiwa omeke okuti, oco upange wa Suku u molehele kokuaye.

⁴ Ca tu sesamela oku linga upange wu wa numa osimbu kuli utanya; eci uteke wiya, lomue o tẽla oku linga upange.

⁵ Osimbu ñasi voluali, ame ndicinyi coluali.

⁶ Oco, eci a popia ndoco, wa siyila posi, kuenje wa tama onata lovate. Wa laña vovaso omeke lonata yaco,

⁷ kuenje wa popia laye hati, Kuende, ka puse vociva ca Siloma, ca lomboloka citi, Catumiwa. Oco wa ka pusile yu wa tiuka, o lete.

⁸ Ava va lisungue laye, lava vo muile muile ale loku eya, va popia vati, Heyeko una wa tumayala loku eya?

⁹ Vamue vati, Eye. Vakuavo vati, Heyeko, puãi wo setahala. Eye hati, Ame.

¹⁰ Oco vo pula vati, Ovaso ove a letuluka ndati?

¹¹ Eye wa kumbulula hati, Omunu una wa tukuiwa Yesu wa tama onata, kuenje wa laña vovaso ange, yu wa popia lame hati, Kuende ko Siloma, ka puseko. Oco ndaile, nda ka pusile, kuenje nda letuluka.

¹² Vo pula vati, O kasi pi? Eye hati, Siko.

¹³ Oco u wa kaile omeke vo tuala ku va Fariseo.

¹⁴ Ca kala esambata eteke Yesu a tama onata yu a patulula ovaso aye.

¹⁵ Va Fariseo vo pula vali ndomo a letuluka. Eye wa va kumbulula hati, Eye wa laña vovaso ange onata, kuenje nda pusa, yu ndete.

¹⁶ Va Fariseo vamue va popia vati, Omunu waco ka tundile ku Suku, momo ka sumbila esambata. Puãi vakuavo vati, Omunu ukuakandu o linga ndati ovilimbu ndevi? Oco va lipatãla pokati kavo.

¹⁷ Oco va popia vali lomeke, vati, Ove hẽ, u tukula ndati, omo a patulula ovaso ove? Yu wa linga hati, Uprofeto.

¹⁸ Puãi va Yudea ka va kolelele okuti wa kaile omeke, yu wa letuluka, te eci va pañinya olonjali viu wa letuluka,

¹⁹ kuenje va va pula vati, U hẽ, omõlene, u vu linga hoti, Wa citiwa omeke? Nda oco, wa letuluka ndati?

²⁰ Olonjali viaye via kumbulula viti, Tu ci okuti omõletu, kuenje wa citiwa omeke.

²¹ Puãi ndeci a lete cilo, ka tu ci, ndaño u wa patulula ovaso aye, ka tu wi. U puli, o kasi lutunga, a ci lipopele eye muẽle.

²² Olonjali viaye via ci popela omo via kala lohele ya va Yudea, momo va Yudea va likuminya ale vati, Nda umue o tava, hati, Eye Mesiya, o tundisua vosunangonga.

²³ Oco olonjali viaye via popela viti, O kasi lutunga, u puli.

²⁴ Oco va pañinya vali omunu wa kaile omeke, kuenje va popia laye vati, Sivaya Suku, momo tu ci okuti omunu waco ondingakandu.

²⁵ Eye wa kumbulula hati, Nda ondingakandu nda ndati, si ci, puãi eci nji ceci okuti, nda kaile omeke, cilo ndete.

²⁶ Oco vo pula vati, Wa ku linga nye? Wa patulula ndati ovaso ove?

²⁷ Eye wa va kumbulula hati, Ndopo eci ndo ci sapuili, kuenje ka wa ci yeveli. Nye vu yonguila oku ci yeva vali? Lenevo vu yongola oku linga olondonge viaye?

²⁸ Kuenje vo penya, vati, Ove vundonge yaye, etu puãi tulondonge via Mose.

²⁹ Tu ci okuti Suku wa popia la Mose, puãi omunu u, oku a tunda ka tuiko.

³⁰ Omunu waco wa va kumbulula hati, Avoyo, eci ocikomo! Ka wa kũlĩhili oko a tunda, haimo wa patulula ovaso ange.

³¹ Tu ci okuti Suku ka yevi olondingakandu, puãi nda omunu o sumbila Suku, kuenje o linga ocipango caye, Suku u yeva.

³² Tunde nunde ka ca la yevala okuti umue wa letulula ovaso omunu wa citiwa omeke.

³³ Omunu u, nda ka tundile ku Suku, nda ka tẽlele oku linga cimue.

³⁴ Vo kumbulula vati, Ove wa citilua ndeti vakandu, ove o tu longisa? Yu vo tundisa.

³⁵ Yesu wa yeva okuti vo tundisa, kuenje, oku u sanga, wo pula hati, Wa kolela Mõla a Suku?

³⁶ Eye wa kumbulula hati, A Ñala, eye elie okuti ndu kolela?

³⁷ Yesu wo sapuila hati, Wo mola, haeye o kasi loku popia love.

³⁸ Kuenje wa popia hati, A Ñala, ñolela, yu wo fendela.

³⁹ Yesu wa popia hati, Voluali ndeyililamo oku tetulula, okuti ava ka va lete va leta, lava va lete va linga olomeke.

⁴⁰ Va Fariseo vamue va kala laye va yeva ovina evi, kuenje vo pula vati, Letu le tulomeke?

⁴¹ Yesu wa popia lavo hati, Nda wa kaile olomeke, nda ko kuete ongole. Puãi, omo vu linga hoti, Tu lete, oco ongole yene vu kasi ño-o layo.