YOANO 8 - Embimbiliya - Bíblia Sagrada em Umbundu

¹ Yesu puãi wa enda komunda yo Oliveira.

² Omele ociteketeke weya vali konembele. Omanu vosi veya kokuaye, yu wa tumala, wa va longisa.

³ Kuenje vakuavisonehua la va Fariseo veya kokuaye lukãi umue wa kuatiwa kupuepue, kuenje va talamisa ukãi vokati kowiñi.

⁴ Yu va popia laye vati, Olongisi, ukãi u wa kuatiwa oku linga upuepue.

⁵ Vovihandeleko, Mose wa tu handeleka oku sosola lovawe ava va linga ndundeti. Ove huti nye?

⁶ Eci va ci popela oku u seteka oco va mole cimue coku u pindika laco. Yesu puãi oku petama wa soneha posi lomuine waye.

⁷ Eci va tongeka oku u pula, eye wa petuka kuenje wa popia lavo hati, U pokati kene ka kasi lekandu a liange oku u nyuñila ewe.

⁸ Oco wa petama vali, yu wa soneha vali posi lomuine.

⁹ Kuenje ovo, eci va ci yeva, va tundapo umue, umue, oku fetika lakulu vaco toke vosi va puapo, kuenje Yesu wa siala lika liaye kumue lukãi.

¹⁰ Oco Yesu wa petuka, yu wo pula hati, Okãi, ava va ku pindika va kasi pi? Lomue wa ku pisa?

¹¹ Eye hati, A Ñala, lomue. Yesu wa popia laye hati, Ndaño ame, si ku pisa. Kuende, ku ka linge vali ekandu.

¹² Yesu wa popia vali lavo hati, Ame ndicinyi coluali. U o ñuama ka endela vali vowelema, puãi o kala locinyi comuenyo.

¹³ Oco va Fariseo va popia laye vati, O limbila uvangi ove muẽle, uvangi o limbila puãi hawociliko.

¹⁴ Yesu wa va kumbulula hati, Ndaño ndi limbila uvangi ame muẽle, haimo uvangi ndi limbila wocili, momo oku nunda njiko, kuenda oku ngenda, ene puãi ka wa kũlĩhili ndaño koku nunda, pamue koku ngenda.

¹⁵ Ene vu tetulula leci ci moleha liso, ame si tetuluila umue.

¹⁶ Haimo, nda netulula, okutetulula kuange kuocili, momo si tetulula lika wange, puãi ame lu wa numa tu tetuluila pamuamue.

¹⁷ Vovihandeleko viene mua sonehiwa okuti uvangi womanu vavali owo wocili.

¹⁸ Ame ndi limbila uvangi, kuenda Isia wa numa o njimbilavo uvangi.

¹⁹ Oco vo pula, vati, So o kasi pi? Yesu wa kumbulula hati, Ka wa ñulĩhili ame, ndaño Tate ka wo kũlĩhili. Nda wa ñulĩhili ame, nda wa kũlĩhivo Tate.

²⁰ Olondaka evi wa vi popela vohondo yoku seleka olombongo eci a longisa vonembele, puãi lomue wo kuata, omo ola yaye ka yeyile handi.

²¹ Oco wa popia vali lavo hati, Ame ngenda, kuenje vu sanda, puãi vu fa lakandu ene. Oko ngenda ko tẽla oku pitilako.

²² Oco va Yudea va pula vati, O lipa eye muele, omo a popia hati, Oko ngenda ko tẽla oku pitilako?

²³ Kuenje eye wa popia lavo hati, Ene wakuaposi, ame ndukuakilu. Ene wakualuali lulo, ame siukualuali luloko.

²⁴ Ndo sapuili ale siti, Vu fa lakandu ene, momo vu fa muẽle lakandu ene nda ko ci kolela okuti ame ame muẽle.

²⁵ Oco vo pula vati, Ove elie? Yesu wa va kumbulula hati, Ame muẽle una ndo sapuili tunde kefetikilo.

²⁶ Ndu kueteli ovina via lua vioku vangula loku tetulula, puãi u wa numa wocili, oco sapula koluali eci nda yeva kokuaye.

²⁷ Ka va limbukile okuti wa va tukuila Isia.

²⁸ Oco Yesu wa popia lavo hati, Eci vu tulika Mõlomanu oco vu limbuka okuti ame, ame muẽle, kuenda okuti si lingi cimue locipango cange, puãi mopia ovina evi ndomo Isia a ndongisa.

²⁹ Kuenje u wa numa o kasi lame, ka sile lika liange, momo ndingainga ño-o ovina viu sanjuisa.

³⁰ Eci a popia ovina evi va lua vo kolela.

³¹ Oco Yesu wa popia la va Yudea vo kolela, hati, Nda vu pandikisa oku pokola kolondaka viange, vulondonge viange ocili,

³² kuenje vu kũlĩha ocili, kuenda ocili cu yovola.

³³ Vo kumbulula vati, Tumbuto ya Avirahama, kuenje ka tua la linga apika vomunu. O popia ndati huti, Vu yovoka?

³⁴ Yesu wa va kumbulula hati, Ocili, ocili, mopia lene siti, Wosi o linga ekandu eye upika wekandu.

³⁵ Upika ka kala hũ vonjo, te omõla eye o kala ño-o hũ vonjo.

³⁶ Oco nda Mõla u yovola vu yovoka cocili.

³⁷ Ndi ci okuti vumbuto ya Avirahama, haimo vu sanda oku njipa, momo ondaka yange ka yi sui vitima viene.

³⁸ Ame mopia ovina nda muila ku Tate, lene vu linga ovina wa yevi ku isiene.

³⁹ Vo kumbulula vati, Isietu Avirahama. Yesu wa popia lavo hati, Nda wa kaili omãla va Avirahama nda vu lingainga ovilinga via avirahama.

⁴⁰ Cilo puãi vu sanda oku njipa, ame ndimunu nda popia lene ocili nda yeva ku Suku. Hacoko ca lingile Avirahama.

⁴¹ Ene vu linga ovilinga via isiene. Va popia laye vati, Hatumãla voku lumbulako. Tu kuete Isietu umuamue, Suku.

⁴² Yesu wa popia lavo hati, Nda Suku wa kaile Isiene, nda ame wa soli, momo nda tunda ku Suku. Sieyile locipango cange, puãi eye wa numa.

⁴³ Eci ñasi loku popia, nye ka cu lombolokeli? Momo ka vu tẽla oku yeva ondaka yange.

⁴⁴ Wa tundi ku isiene eliapu, oco vu yonguila oku linga ocipango ca isiene. Eye omondi tunde kefetikilo, haeye ka la sumbila ocili momo vokati kaye ka muli ale ocili. Eci a popia uhembi o popia caye muẽle, momo eye ohembi, haeye isia yuhembi.

⁴⁵ Puãi omo mopia ocili ene ka vu ñolela.

⁴⁶ Pokati kene helie o misila ekandu? Nda mopia ocili, nye ko ñoleleli?

⁴⁷ U o tiamela ku Suku eye o yeva yeva olondaka via Suku. Ene ka vu vi yeva yeva omo ka vu tiamela ku Suku.

⁴⁸ Va Yudea vo kumbulula vati, Ka tua popele ocili eci tua popia tuti, Ove vu Samária, haive o kuetiwe locilulu?

⁴⁹ Yesu wa kumbulula hati, Si kuetiwe locilũlu, puãi sumbila Tate, ene puãi ame ka vu sumbila.

⁵⁰ Haimo lumue, si lisandela ulamba. Kuli ale U o kasi loku u sandela, kuenje eye o linga onganji.

⁵¹ Ndu sapuili siti, Ocili, ocili, omunu nda o pandikisa loku pokola kondaka yange, ka moli okufa.

⁵² Va Yudea va popia laye vati, Kaliye tua limbuka okuti o kuetiwe locilũlu. Avirahama wa fa, kuenda ovaprofeto, haimo o popia huti, Omunu nda o pokola kondaka yange ka moli okufa.

⁵³ Ove nga wa velapo okuti isietu Avirahama wa fa o sule? Ovaprofeto lavovo va fa! Ove nga wa sima okuti ove elie?

⁵⁴ Yesu wa kumbulula hati, Nda ndi limuisa ame muẽle ulamba, ulamba waco holambako. Tate, una vu tukula hoti, Eye Suku yetu, eye o muisa ulamba.

⁵⁵ Puãi ka wo kũlĩhili, ame Puãi ndo kũlĩha. Nda nda popia siti, Sio kũlĩhile nda ndihembi ndene. Puãi ndo kũlĩha, kuenje mokola kondaka yaye.

⁵⁶ Kukululu yene Avirahama wa yolela omo a lavoka oku mola eteke liange. Wa li mola, kuenje wa li sanjukila.

⁵⁷ Oco va Yudea va Popia laye vati, Kua tẽlele handi akui atãlo kanyamo. Wa mola ndati Avirahama?

⁵⁸ Yesu wa popia lavo hati, Ndu sapuili siti, Ocili, ocili, osimbu Avirahama ka citiwile, ame, ame u.

⁵⁹ Oco va nyañula ovawe oku u sosola, Yesu puãi wa salama kuenje wa tunda vonembele.