YOANO 7 - Embimbiliya - Bíblia Sagrada em Umbundu

¹ Kovaso yaco Yesu wa ñuala ñuala vo Galilea, ka yonguile oku ñuala ñuala vo Yudea omo va Yudea va sanda oku wipa.

² Oco ofesta yimue ya va Yudea, okuti ofesta yolosinge, ya kala ocipepi.

³ Oco va manjaye va popia laye vati, Kulo tundako, kuende ko Yudea, oco olondonge viove vi mole ovilinga o kasi loku linga.

⁴ Momo lomue o linga cimue vuyombeki nda o livela oku kũlĩhiwa. Nda o linga ovina ndevi, lilekisa koluali.

⁵ Momo ndaño vamanjaye ka vo kolelele.

⁶ Yesu wa popia lavo hati, Eteke liange ka lieyile handi, puãi eteke liene li kasi ño-o.

⁷ Oluali ka lu tẽla oku u suvuki, ame puãi lu suvuka omo njimba uvangi okuti ovilinga vialuo via vĩha.

⁸ Kuendi kofesta ene muẽle. Ame si endiko omo ola yange ka yeyile handi.

⁹ Kuenje, eci a popia lavo ovina evi, eye wa siala vo Galilea.

¹⁰ Puai, eci okuti vamanjaye va lamana ale kofesta, oco layevo wa enda, puãi haloku limolehisako te uyombeki.

¹¹ Kofesta, va Yudea va kala loku u vanjiliya, vati, O kasi pi?

¹² Kuenje pokati komanu pa kala oku u mumuila kua lua. Vamue va linga vati, Eye omunu muẽle wa sunguluka. Vakuavo puãi vati, Hacoko, o kasi loku lueyisa omanu.

¹³ Haimo lumue, lomue wo vangula kovaso omanu, omo va kala lohele ya va Yudea.

¹⁴ Puãi pokati la kati kofesta, Yesu wa iñila vonembele, kuenje wa longisa.

¹⁵ Oco va Yudea va komoha vati, Undeti wa kũlĩha ndati ovisonehua, ka lilongisile pua?

¹⁶ Oco Yesu wa va kumbulula, hati, Okulonga kuange hakuangeko te ku wa numa.

¹⁷ Nda umue wa panga oku linga ocipango caye, eye o kũlĩha okulonga kuaco, nda hẽ kua Suku, ele nda ci popia ño ame muẽle.

¹⁸ U o popia ño eye muẽle, o sanda ulamba waye, puãi u o sanda ulamba wu wo tuma eye wocili. Vokuaye ka muli uhembi.

¹⁹ Mose hẽ, ka wihili ovihandeleko? Haimo lumue, lomue pokati kene o pokola kovihandeleko. Nye vu sandela oku njipa?

²⁰ Owiñi wa kumbulula vati, O vela kutue. Helie o sanda oku ku ipa?

²¹ Yesu wa va kumbulula hati, Ocikomo cimosi lika nda linga kuenje vosi wa komohi.

²² Mose wa wihi evamba, puãi Mose haeyeko wa li eca te vakukululu, haimo kesambata vu sevisa omunu.

²³ Oco, nda omunu o seviwa kesambata okuti ocihandeleko ca Mose ka ci samiwa, ci tava ndati oku nemela ame omo nda sakula etimba liosi liomunu kesambata?

²⁴ Ko ka tetuluili ño eci ci moleha, puãi tetululi lesunga.

²⁵ Oco va Yerusalãi vamue va popia vati, U, heyeko una va yongola oku ipa?

²⁶ Haimo yu, o popela kovaso omanu lutoi kuenje ka va popi laye cimue. Oco hẽ, asongui va limbuka nga okuti eye Kristu?

²⁷ Puãi u, tua kũlĩha oku a tunda. Eci Kristu eya, lomue o kũlĩha oku a tunda.

²⁸ Oco Yesu, eci a kala loku longisa vonembele, wa popia lolukandi, hati, Vu nji, kuenda wa kũlĩhi oku nda tunda. Puãi sieyile ño locipango cange. U wa numa eye wocili, ene puãi ka wo kũlihili.

²⁹ Ame ndo kũlĩha, momo nda tunda kokuaye, eye wa numa.

³⁰ Oco va seteka oku u kuata puãi lomue wa wimba eka, momo ola yaye ka yeyile handi.

³¹ Puãi va lua pokati komanu vaco vo kolela, va pula vati, Eci Mesiya eya o linga ovilimbu via lua, okuti evi via linga omunu u vi sule?

³² Va Fariseo va yeva ndomo owiñi wo mumuila ovina evi, kuenje ovitunda vinene la va Fariseo va tuma akuenje vovitunda oku u kuata.

³³ Oco Yesu wa linga hati, Ñasi handi kumue lene okasimbu kaño, oco noke ngenda ku-u wa numa.

³⁴ Vu sanda puãi ko sangi. Kuenje oko ñasi ko tẽla oku pitilako.

³⁵ Va Yudea va livangula pokati vati, Omunu u enda pi okuti ka tu u sangi? Enda nga ku va Yudea va sandokaila pokati ka va Helasi loku longisa va Helasi?

³⁶ Eci a popia hati, Vu sanda, puãi ko sangi, kuenda vali hati, Oko ñasi ko tẽla oku pitilako, ca lomboloka ndati?

³⁷ Keteke lia sulako liofesta, hailio eteke linene, Yesu wa talama, kuenje wa popia lolukandi hati, Umue nda o kasi lenyona, eye kokuange, a nyue.

³⁸ U o ñolela, vutima waye mu tunda olondui viovava omuenyo, ndeci ca popia ovisonehua.

³⁹ Puãi eci, wa ci popela Espiritu lina ava vo kolela va laika oku tambula. Momo Espiritu keyile handi, omo Yesu ka iñilile handi vulamba.

⁴⁰ Eci va yeva olondaka evi, oco omanu vamue va kalako, va popia vati, Ocili eye uprofeto waco.

⁴¹ Vakuavo vati, Eye o Mesiya. Puãi vamue vati, Mesiya nga o tunda ko Galilea?

⁴² Ocisonehua hẽ, ka ca popele citi, Mesiya ukuambuto ya Daviti, o tunda ko Beteleme, kimbo oko kua tungile Daviti?

⁴³ Oco owiñi wa litepa mekonda liaye.

⁴⁴ Vamue va yonguile oku u kuata, puãi lomue wo wimba eka.

⁴⁵ Akuenje va tumiwile va tiuka kovitunda vinene kuenda ku va Fariseo. Oco va pula akuenje veya, vati, Nye ka wo neneleli?

⁴⁶ Akuenje va kumbulula vati, Lomue omunu wa la popia ndomunu waco o-o.

⁴⁷ Oco va Fariseo va popia lavo vati, Lenevo wa lueyisiwi?

⁴⁸ Anga, umue pokati kovasongui wo tava, pamue umue pokati ka va Fariseo?

⁴⁹ Puãi owiñi u ka wa kũlĩhile ovihandeleko, wa siñaliwa.

⁵⁰ Nikodemo, una wa ile ale kokuaye, haiye ukuacisoko ca va Fariseo, wa popia lavo hati,

⁵¹ Ovihandeleko vietu hẽ, vi pisa omunu osimbu ka vo yevele eye muẽle, loku kũlĩhisa eci a linga?

⁵² Kuenje va kumbulula vati, Lovevo, u Galilea? Kũlĩhisa lutate kuenje o limbuka okuti ko Galilea ka ku tundi uprofeto.

⁵³ Va enda vosi, omunu konjo yaye, omunu konjo yaye.