YOANO 6 - Embimbiliya - Bíblia Sagrada em Umbundu

¹ Oco noke Yesu wa tunda, wa enda kesinya liokalunga ka Galilea, haiko ka Tibéria.

² Kuenje owiñi wa lua wo kuama omo va mola ovilimbu a lingila ava va vela.

³ Yesu wa londa komunda, oko a tumala lolondonge viaye.

⁴ O Pascoa, ofesta ya va Yudea, ya kala ocipepi.

⁵ Yesu wa petula ovaso, kuenje wa mola owiñi wa lua wiyilila kokuaye, yu wa pula Filipu hati, Tu landa pi olombolo okuti va lia?

⁶ Wa ci popela oku u seteka, momo eye muẽle wa kũlĩha ale eci a soka oku linga.

⁷ Filipu wo kumbulula hati, Olombolo viovita vivali kolosingu ka vi va tẽla okuti vosi va tambula, omunu kamue, omunu kamue.

⁸ Umue polondonge viaye, Andereu, huva a Simono Petulu, wa popia laye hati,

⁹ Kulo kuli ukuenje umue o kuete olombolo vitãlo viosevata kuenda otulosi tuvali, puãi vi tẽla nye pokati kava va lua ndava?

¹⁰ Yesu hati, Tumalisi omanu. Oku kua kala owangu wa lua. Ava va tumalako va soka ndolohũlũkãi vitãlo vialume.

¹¹ Oco Yesu wa nyañula olombolo kuenje, eci a vi panduila, wa vi amuila ava va tumala, haico otulosi ndeci va yongola.

¹² Kuenje, eci ve kuta, eye wa popia lolondonge viaye hati, Nolipo ovimalañanya via supapo okuti lacimue ci peseka.

¹³ Oco va vi nolapo, kuenje ekui liovitenge kovitenge vivali vie yuka ovimalañanya violombolo vitãlo viosevata via supa kuava va lia.

¹⁴ Oco, eci omanu va mola ocilimbu a linga, va popia vati, Ocili u, eye uprofeto una o laika oku iya voluali.

¹⁵ Yesu, omo a limbuka okuti va si oku iya oku u kuata ha vo vialeka, oco wa tiukila komunda lika liaye.

¹⁶ Kuenje, eci ekumbi lia enda, olondonge viaye via lokila kokalunga.

¹⁷ Va wila vowato, kuenje va fetika oku yokila ko Kafarinau. Kua tekava ale, kuenje Yesu, lopo handi, keyile kokuavo.

¹⁸ Kuenje, omo ofela ya sika ca lua, okalunga ka tema.

¹⁹ Eci va tapula owato ca soka ndolo-kilõmetro vitãlo pamue epandu, oco va mola Yesu endela kilu liovava, yu wa pitila ocipepi lowato. Va kala lusumba,

²⁰ puãi eye wa popia lavo hati, Ame. Ko ka yokoki.

²¹ Eci va tava oku u tambula vowato, haico owato wa pitila kongongo kuna va loña.

²² Hẽla yaco, owiñi wa siala kesinya wa mola okuti ka kua kaile owato ukuavo, te umuamue lika, kuenda okuti Yesu ka wilile vowato kumue lolondonge viaye, olondonge puãi via enda lika liavio.

²³ Haimo lumue, awato akuavo a tunda ko Tibéria eya ocipepi lusenge muna va lila olombolo, cina Ñala a yi panduila.

²⁴ Oco, eci owiñi wa mola okuti Ñala ka kasiko, ndaño olondonge viaye, va wila vawato, kuenje veya ko Kafarinau oku sanda Yesu.

²⁵ Eci vo sanga kesinya liokalunga, vo pula vati, A Rambei, weya kulo ola yi pi?

²⁶ Yesu wa va kumbulula hati, Mopia lene siti, Ocili, ocili, ka vu sandela omo wa moli ovilimbu, te omo wa li olombolo, yu we kuti.

²⁷ Ko ka likavisili okulia ku nyõleha, te okulia ku kala ta komuenyo ko pui, oku Mõlomanu a wihi. Momo Isia, haeye Suku, wo kapela ondimbukiso.

²⁸ Va popia laye vati, Tu linga nye okuti tu linga upange wa Suku?

²⁹ Yesu wa va kumbulula hati, Upange wa Suku wowu, oku kolela u wa tumiwa laye.

³⁰ Oco vo pula vati, Nda oco, ove o linga ocilimbu ce okuti tu ci tala, kuenje tu ku kolela? O linga upange we?

³¹ Vakukululu vetu va lia lia mana vekalasoko ndeci ca sonehiwa citi, Wa va iha ombolo yokilu oku lia.

³² Oco Yesu wa va kumbulula hati, Mopia lene siti, Ocili, ocili, Mose haeyeko wo wihi ombolo yokilu, te Tate eye o wihi ombolo yocili yokilu.

³³ Momo ombolo ya Suku yeyi yi tunda kilu, kuenje yeca omuenyo koluali.

³⁴ Oco va popia laye vati, A Ñala, ombolo oyo tu yi ihaihe ño-o.

³⁵ Yesu wa popia lavo hati, Ame ndimbolo yomuenyo. U iya kokuange ka kuata onjala, lu o ñolela ka yevi vali enyona.

³⁶ Puãi, ndeci ndo sapuili ale haico, ndaño wa moli haimo ka vu kolela.

³⁷ Vosi Isia a nyiha, veya kokuange, kuenje u iya kokuange siu takumula.

³⁸ Momo sia tundilile kilu oku linga ocipango cange, te ocipango cu wa numa.

³⁹ Kuenje ocipango cu wa numa ceci okuti, vosi a nyiha si nyelisapo umue, puãi ndu pindula keteke lia sulako.

⁴⁰ Momo ocipango ca Tate ceci, okuti, wosi o limbuka Mõla loku u kolela, o kala lomuenyo ko pui, kuenje ame ndu pindula keteke lia sulako.

⁴¹ Oco va Yudea vo mumuila omo a linga hati, Ame ndimbolo ya tunda kilu.

⁴² Kuenje vati, Heyeko hẽ Yesu, omõla a Yosefe, isiaye la inaye tu vai? Kaliye o popia ndati hati, Nda tunda kilu?

⁴³ Yesu wa va kumbulula, hati, Ko ka ñuñuli pokati kene.

⁴⁴ Lomue o tẽla oku iya kokuange, te Isia wa numa u koka. Kuenje ame ndu pindula keteke lia sulako.

⁴⁵ Ca sonehiwa vovaprofeto citi, Kuenje vosi va longisiwa la Suku. Wosi o yeva ku Isia, loku lilongisa kokuange, iya kokuange.

⁴⁶ Ka ci kasi okuti umue wa mola Isia. U wa tunda ku Suku, eye lika wa mola Isia.

⁴⁷ Mopia lene siti, Ocili, ocili, u o kolela o kuete omuenyo ko pui.

⁴⁸ Ame ndimbolo yomuenyo.

⁴⁹ Vakukululu vene va lia mana vekalasoko kuenje va fa.

⁵⁰ Ombolo ya tunda kilu yeyi, omunu nda o liako, ka fi.

⁵¹ Ame ndimbolo yi kasi lomuenyo ya tunda kilu. Umue nda o lia kombolo eyi, o kala ño-o hũ lomuenyo. Kuenje ombolo ngecela omuenyo woluali oyo etimba liange.

⁵² Va Yudea va lihoya pokati, vati, Omunu u o tẽla ndati oku tu iha etimba liaye ha tu li li?

⁵³ Oco Yesu wa popia lavo hati, Mopia lene siti, Ocili, ocili, nda ka vu li etimba lia Mõlomanu, loku nyua osonde yaye, ka vu kuete omuenyo vovitima viene.

⁵⁴ U o lia etimba liange kuenda o nyua osonde yange o kuete omuenyo ko pui, kuenje ndu pindula keteke lia sulako.

⁵⁵ Momo etimba liange okulia muẽle kuenda osonde yange oku nyua muẽle.

⁵⁶ U o lia etimba liange kuenda o nyua osonde yange, o kala vokuange lame ñala vokuaye.

⁵⁷ Ndeci Isia a kasi lomuenyo wa numa, kuenje ndi muila omuenyo ku Isia, haico u o ndia a muilavo omuenyo kokuange.

⁵⁸ Eyi, oyo ombolo ya tunda kilu. Handeciko vakukululu vene va lia ombolo kuenje va fa. U o lia ombolo eyi o kala ño-o hũ lomuenyo.

⁵⁹ Eye wa popela ovina evi vosunangonga eci a longisa vo Kafarinau.

⁶⁰ Oco olondonge viaye via lua, eci va yi yeva, va popia vati, Ondaka eyi ya kãla. Helie o tela oku yi yeva?

⁶¹ Puãi Yesu, omo a limbuka vutima waye okuti olondonge viaye via yi mumuila, oco wa va pula, hati, Ondaka eyi hẽ, yo tatami?

⁶² Nda oco, vu sima nye nda vu mola Mõlomanu o li loku londa oko a tundile?

⁶³ Espiritu olio li muisa omuenyo, etimba ka li tẽla cimue. Olondaka nda popia lene ovio espiritu, haivio omuenyo.

⁶⁴ Puãi lopo pokati kene pali vamue ka va kolela. Momo Yesu, tunde kefetikilo, wa kũlĩha ale ava ka va kolelele, kuenda u o laika oku u pakula.

⁶⁵ Kuenje eye wa linga hati, Oco nda popela lene siti, Lomue o tẽla oku iya kokuange te nda co wihiwa la Isia.

⁶⁶ Tunde opo va lua pokati koloñame viaye va tiukila konyima, kuenje ka va endaile vali laye.

⁶⁷ Oco Yesu wa pula ekui liaco la vavali, hati, Lene wendivo?

⁶⁸ Simono Petulu wo kumbulula hati, A Ñala, kulie tu enda? Ove, ove o kasi lolondaka viomuenyo ko pui.

⁶⁹ Etu tua kolela, kuenda tua limbuka okuti ove U o kola wa Suku.

⁷⁰ Yesu wa va kumbulula hati, Sio noleli hẽ ekui liomanu komanu vavali, kuenje umue pokati kene eliapu?

⁷¹ Wa ci popela Yuda, omõla a Simono Isikariote, umue pekui liaco la vavali, haeye o laika oku u pakula.