YOANO 5 - Embimbiliya - Bíblia Sagrada em Umbundu

¹ Kovaso yovina evi kua kala ofesta ya va Yudea, kuenje Yesu wa lamanela ko Yerusalãi.

² Vo Yerusalãi, ocipepi lombundi yolomeme, muli ociva ca tukuiwa vu Heveru Betesaita. Ci kuete ovindumba vitãlo.

³ Vovindumba viaco mua pekaila owiñi wolombei kuenda olomeke, kuenda ovilema, lava va fa ovolu. Va talamela okutumuha kuovava.

⁴ Momo, olonjanja vimue, ungelo wa Ñala, oku wila vociva, o tumuhisa ovava aco, kuenje u o teteka oku wilamo eci a tumuha, o kaya kuvei u kuete.

⁵ Kua kala ulume umue wa vela uvei waye akui atatu kanyamo kanyamoe celãla.

⁶ Oco, eci Yesu o mola wa pekela, kuenje wa kũlĩha okuti wa kalako osimbu, oco wa popia laye hati, O yongola oku kaya?

⁷ Ombei yo kumbulula, yiti, A Ñala, si kuete u o ñapa lonjanga vociva eci ovava a tumuha, kuenje osimbu seteka ame muẽle oku enda, umue wiñi o ndiangelamo.

⁸ Yesu wa popia laye hati, Votoka, tikula ula wove, kuende.

⁹ Haico ulume waco a kaya, kuenje wa tikula ula waye, yu wa enda. Eteke liaco puãi ca kala esambata.

¹⁰ Oco va Yudea va popia lu wa sakuiwa, vati, Etaili esambata. Ka ci tava oku ambata ula wove.

¹¹ Puãi eye wa va kumbulula, hati, U wa sakula, eye wa sapuila, hati, Tikula ula wove, kuende.

¹² Vo pula vati Omunu wa ku sapuila hati, Tikula ula wove, kuende, helie?

¹³ Puãi u wa sakuiwa ko kũlĩhile momo Yesu wa punduluka, omo kua kala owiñi.

¹⁴ Noke Yesu wo sanga vonembele, kuenje wa popia laye hati, Tala, wa kanguka. Ku ka linge vali ekandu, sanga cimue cĩvi vali enene ci ku kuata.

¹⁵ Omunu waco wa enda, wa sapuila va Yudea hati, u wa sakula, Yesu.

¹⁶ Omo Yesu a linga ovina evi kesambata oco va Yudea vo silañanyaila

¹⁷ Puãi Yesu wa va kumbulula, hati, Toke cilo Tate o linga upange, lamevo ndinga upange.

¹⁸ Oco va Yudea va sandela ca lua oku wipa, haku samako lika esambata, puãi omo a lisokisa la Suku eci a tukula Suku hati, Tate.

¹⁹ Yesu wa popia lavo hati, Mopia lene siti, Ocili, ocili, Mõla ka tẽla oku linga cimue eye muẽle, te eci a lete ku Isia oco lika a linga, Cosi Isia a linga haico Mõla a lingavo.

²⁰ Momo Isia o sole Mõla, kuenje u lekisa ovina viosi a kasi loku linga, eye muẽle, kuenje u lekisa ovilinga via velapo, okuti evi vi sule, oco vu komohe.

²¹ Momo ndeci Isia a pindula vakualufa kuenda o va iha omuenyo, haico Mõla a eca omuenyo ku a panga.

²² Momo Isia ka tetuluila umue, puãi omoko yosi yoku tetulula wa yi eca ku Mõla,

²³ oco vosi va sumbile Mõla ndeci va sumbila Isia. U ka sumbila Mõla ka sumbilavo Isia wo tuma.

²⁴ Mopia lene siti, Ocili, ocili, u o yeva ondaka yange, kuenje o kolela u wa numa, o kuete omuenyo ko pui. Keya koku tetuluiwa, puãi wa iluka ale vokufa, wa iñila vomuenyo.

²⁵ Mopia lene siti, Ocili, ocili, ola yiya kuenda yeya ale, okuti vakualufa va yeva ondaka ya Mõla a Suku, kuenje ava va yi yeva va mola omuenyo.

²⁶ Momo, ndeci Isia a likuetele omuenyo, haico a eca ku Mõla omoko yoku likuatela omuenyo.

²⁷ Wa wihavo omoko yoku tetulula omo eye Mõlomanu.

²⁸ Ko ka ci komohi, momo ola yiya eci vosi va kasi vayambo va yeva ondaka yaye,

²⁹ yu va tundamo. Ava va linga ciwa, va tundila epinduko liomuenyo, ava va linga cĩvi, va tundila epinduko liekanga.

³⁰ Si tẽla oku linga cimue lika liange. Ndeci ndi yeva, haico netulula, kuenje onimbu yange yesunga, momo si sandi oku linga ocipango cange, te ocipango cu wa numa.

³¹ Nda ndi limbila uvangi ame muẽle uvangi wange hawociliko.

³² Umue wiñi o njimbila uvangi kuenje ndi ci okuti uvangi waye wocili.

³³ Wa tumili ku Yoano, kuenje Yoano wa imbila ocili uvangi.

³⁴ Puãi uvangi nda tava hawomanuko, haimo lumue, mopia ovina evi okuti oco vu popeliwe.

³⁵ Eye wa kala ondiyelo ya taima ya tua, kuenje wa tavi oku yolela vocinyi cayo okasimbu kaño.

³⁶ Puãi ñuete uvangi wa velapo, okuti wa Yoano u sule. Momo ovilinga Tate a nyiha oku vi malusula, haivio ndingainga, ovio vi njimbila uvangi wokuti Isia wa numa.

³⁷ Kuenje Isia wa numa eye wa njimbila uvangi. Ka wa la yevi ondaka yaye, ndaño eye muẽle ka wa lo moli.

³⁸ Ondaka yaye ka vu yi kuete okuti yi kala ño-o vovitima viene, momo u o tuma ka wo koleleli.

³⁹ Vu konomuisa ovisonehua, momo wa soki hoti, Omo tu muila omuenyo ko pui, kuenje evi ovio vi njimbila uvangi;

⁴⁰ haimo ko tavi oku iya kokuange ho kuati omuenyo.

⁴¹ Si tambula ulamba komanu.

⁴² Puãi ndo kũlĩhi okuti ko kuete ocisola ca Suku vovitima viene.

⁴³ Ame ndeyilila vonduko ya Tate, kuenje ka wa nambuili. Nda kuiya umue wiñi iyilila vonduko yaye muẽle eye vu tambula.

⁴⁴ Vu kala ndati lekolelo, ene vu liaveli pokati ulamba ene muẽle, kuenje ko sandi ulamba u tunda lika ku Suku?

⁴⁵ Ko ka soki okuti ndu pindiki ku Isia. U u pindiki Mose, una wa imbi ondunge.

⁴⁶ Momo, nda wa koleleli Mose, nda wa ñolelivo, momo eye wa soneha oku ndombolola.

⁴⁷ Puãi, nda ka vu kolela ovisonehua viaye, vu kolela ndati olondaka viange?