YOANO 4 - Embimbiliya - Bíblia Sagrada em Umbundu

¹ Eci Ñala a kũlĩha okuti va Fariseo va yeva okuti Yesu wa tavisa kuenda wa papatisa olondonge via lua, okuti via Yoano vi sule,

² ndaño Yesu ka papatisile eye muele, te olondonge viaye,

³ oco wa tunda vo yudea, loku enda vali ko Galilea.

⁴ Kuenje co pitisa vo Samária.

⁵ Oco weya ko Sukare, imbo limue lio ko Samária lia kala ocipepi lusenge Yakoba a ecele komõlaye Yosefe.

⁶ Ocisimo ca Yakoba haiko ca kala. Oco yesu, omo a kava lungende waye, wa tumala pocisimo. Ca soka ndola yepandu.

⁷ Kuenje ukãi umue u Samária weya oku tapa ovava. Yesu wa popia laye hati, Nyiheko ovava oku nyua.

⁸ Momo olondonge viaye via ka landa okulia vimbo.

⁹ Ukãi u Samária wa popia laye hati, Ove u Yudea o minga ndati ovava oku nyua, ame ndukãi u Samária? Momo va Yudea ka va likile la va Samária.

¹⁰ Yesu wo kumbulula hati, Nda wa kũlĩhile ocali ca Suku kuenda u o popia love hati, Nyiheko ovava oku nyua, nda wo pingile, kuenje eye nda wa ku iha ovava omuenyo.

¹¹ Ukãi wa popia laye hati, A Ñala, ku kuete ociyenjo, kuenda ocisimo ca tonga. Upa pi ovava aco omuenyo?

¹² Anga, ove wa velapo, okuti kukululu yetu Yakoba o sule? Eye wa tu iha ocisimo, kuenje wa nyuako eye muẽle lomãla vaye lovinyama viaye.

¹³ Yesu wo kumbulula hati, Wosi o nyua kovava a, o yeva vali enyona,

¹⁴ puãi u wosi o nyua kovava ndu wiha ka yevi vali enyona oloneke ka vi pui. Puãi ovava ndu wiha o lingila vokati kaye ono yovava yi tombokaila omuenyo ko pui.

¹⁵ Ukãi wa Popia laye hati, A Ñala, nyiheko ovava aco, oco si ka yeve vali enyona pamue oku iyaiya vali kulo oku tapa.

¹⁶ Yesu wa popia laye hati, Kuende, ka pãninye veyove, oco wiye vali kulo.

¹⁷ Ukãi wo kumbulula hati, Si kuete veyange. Yesu wa popia laye hati, Wa popia ciwa huti, Si kuete veyange.

¹⁸ Momo wa kaile lalume vatãlo, kuenje u o kasi laye cilo haveyoveko. Eci wa popia, ocili.

¹⁹ Ukãi wa popia laye hati, A Ñala, nda limbuka okuti vuprofeto.

²⁰ Vakukululu vetu va fendaila Suku vomunda eyi. Ene puãi vu linga hoti, Vo Yerusalãi omo mua sesamela omanu oku fendelelamo Suku.

²¹ Yesu wa popia laye hati, Okãi, ñolele, ola yiya yokuti ka vu fendaila Isia, ndaño vomunda yilo, ndaño vo Yerusalãi.

²² Ene vu fendela eci ka wa kũlĩhili, etu tu fendela eci tua kũlĩha, momo okupopelua ku tunda ku va Yudea.

²³ Puãi ola yiya, kuenda yeya ale okuti, vakuakufendela vocili va fendaila Isia vespiritu locili, momo omanu ndovo ovo Isia a sanda oku u fendela.

²⁴ Suku Espiritu kuenje ca sesamela ava vo fendaila oku u fendela lespiritu locili.

²⁵ Ukãi wa popia laye hati, Ndi ci okuti Mesiya, una wa tukuiwa Kristu, iya. Eci eya o tu sapuila ovina viosi.

²⁶ Yesu wa popia laye hati, Ame muẽle ñasi loku popia ndeti love.

²⁷ Haico olondonge viaye vieya. Va komoha ndomo a kala loku vangula lukãi, puai lomue wo pula hati, O yongola nye? pamue, Nye o vanguila laye?

²⁸ Oco ukãi wa sia ombia yu wa enda vimbo, kuenje wa popia lomanu hati,

²⁹ Ota, enjui. Ndo tali ulume wa sapuila ovina viosi nda linga. Mbi pamue eye Kristu?

³⁰ Oco va tunda vimbo oku iya kokuaye.

³¹ Osimbu yaco olondonge vio peya, viti, A Rambei, lia.

³² Puãi eye wa popia lavo hati, Ñuete ale okulia kumue, ene puãi, okulia kuaco ka vu kui.

³³ Oco olondonge via livangula pokati, viti, Umue mbi wo nenela okulia, ale?

³⁴ Yesu wa popia lavo hati, Okulia kuange oku linga ocipango cu wa numa kuenda oku suisapo upange waye.

³⁵ Ene, ka vu popia popia hẽ, hoti, Kua kamba olosãi vikuãla oco kuiya oku ungula? Ame ndu sapuili siti, Petuli ovaso ene. Vanji kovapia okuti a yelela ale oku ungula.

³⁶ U ungula o tambula ofeto, kuenje ungula epako liokomuenyo ko pui. Oco u imba ombuto, lu ungula, va yolelela kumuamue.

³⁷ Oco olusapo luokuti, Umue imba ombuto, ukuavo ungula, lua linga luocili.

³⁸ Ndo tumi oku ungula eci ka wa kaveleli. Vakuavo va linga upange, kuenje ene wa iñilili vupange wavo.

³⁹ Va Samária va lua vakuimbo liaco vo tavela ondaka yukãi wa imba uvangi, hati, Wa sapuila ovina viosi nda linga.

⁴⁰ Oco, eci va Samária veya kokuaye, vo peya oku kala lavo handi. Yu wa kalako oloneke vivali.

⁴¹ Kuenje va lua vakuavo va tava omo va yeva ondaka yaye.

⁴² Oco va popia lukãi vati, Cilo ka tua tavelelele ño olondaka viove, momo tua liyevela etu muẽle, kuenje tua limbuka okuti ocili eye Upopeli woluali.

⁴³ Oco, eci pa pita oloneke viaco vivali, Yesu wa enda ko Galilea.

⁴⁴ Momo Yesu eye muẽle wa imba uvangi hati, Uprofeto ka sangi esumbilo vofeka yavo muẽle.

⁴⁵ Oco, eci eya ko Galilea, va Galilea vo hindikisa omo va mola ovina viosi a linga vo Yerusalãi kotembo yofesta, momo lavovo va ilevo.

⁴⁶ Yesu weya vali ko Kana ko vo Galilea, kuna a pongoluisile ovava yu a linga ovinyu. Kuenje ko Kafarinau kua kala umue ukulu wovelombe, omõlaye ulume o vela.

⁴⁷ Eci a yeva okuti Yesu wa tunda ko Yudea kuenje wa iñila vo Galilea, oco wa enda kokuaye, wa pinga okuti iya o sakula omõlaye, momo o yongola oku fa.

⁴⁸ Oco Yesu wa popia laye, hati, Ene ka vu tava te nda vu mola ovilimbu lovikomo.

⁴⁹ Ukulu wovelombe wa popia laye hati, A Ñala, enju osimbu omõlange ka file.

⁵⁰ Yesu wa popia laye, hati, Kuende, omõlove o kasi lomuenyo. Omunu waco wa kolela ondaka Yesu a popia laye, oco wa enda.

⁵¹ Eci a kala loku enda akuenje vaye va ñualehela laye vati, Omõlove o kasi lomuenyo.

⁵² Oco a va pula ola a fetika oku kaya. Vo sapuila vati, Hẽla, kola yepanduvali, oco owuya wo weca.

⁵³ Oco isiaco wa ci limbuka okuti ola yaco haiyo Yesu a popia laye hati, Omõlove o kasi lomuenyo. Oco eye muẽle wa tava lonjo yaye yosi.

⁵⁴ Eci oco ocilimbu cavali Yesu a linga eci a tunda vo Yudea kuenje weya vo Galilea.