YOANO 3 - Embimbiliya - Bíblia Sagrada em Umbundu

¹ Kua kala omunu umue, u Fariseo, onduko yaye Nikodemo, haeye ukulu wa va Yudea.

² Ulume waco weya ku Yesu uteke kuenje wa popia laye hati, A Rambei, tu ci okuti vulongisi wa tunda ku Suku, momo lomue o tẽla oku linga ovilimbu o lingainga te Suku o kasi laye.

³ Yesu wo kumbulula hati, Mopia love siti, Ocili, ocili, omunu ka tẽla oku mola usoma wa Suku, te wa citiwa evali.

⁴ Nikodemo wa popia laye hati, Omunu o tẽla ndati oku citiwa nda ukulu ale? O tẽla nga oku iñila vali vimo lia inaye loku citiwa evali?

⁵ Yesu wa kumbulula hati, Mopia love siti, Ocili, ocili, omunu ka tẽla oku iñila vusoma wa Suku, te o citiwa lovava kuenda Espiritu.

⁶ Eci ca citiwa letimba, etimba, leci ca citiwa le Espiritu, espiritu.

⁷ Ku ka komohe omo nda popia love siti, Co sesameli oku citiwa evali.

⁸ Ofela yi sikila oko yi panga kuenje o yeva okuõla kuayo, puãi kua kũlĩhile oku yi tunda, pamue koku yenda. Haico ci kasi la vosi va citiwa le Espiritu.

⁹ Nikodemo wo pula hati, Ovina evi vi lingiwa ndati?

¹⁰ Yesu wo kumbulula hati, Ove, ove vulongisi wa Isareli, lopo haimo ovina evi ka via ku lombolokele?

¹¹ Mopia love siti, Ocili, ocili, tu vangula ovina tua kũlĩha, kuenje ovina tua mola ovio tu imbila uvangi, ene puãi ka vu tava kuvangi wetu.

¹² Nda ndo sapuili ovina viokilu lieve kuenje ka wa taveli, vu tava ndati nda ndu sapuili ovina viokilu?

¹³ Lomue wa la londa kilu, te u wa loka kilu, okuti Mõlomanu.

¹⁴ Kuenje ndeci Mose a tulika onyoha vekalasoko, haico Mõlomanu o tulikiwa,

¹⁵ okuti wosi u kolela o mola omuenyo ko pui.

¹⁶ Omo Suku a sola ndoco oluali, oco a ecela Omõlaye wongunga okuti wosi u kolela ka fi, puai o mola omuenyo ko pui.

¹⁷ Momo Suku ka tumilile Omõla voluali oku pisa oluali, wo tumila okuti oluali lu popeliwa laye.

¹⁸ U u kolela ka pisiwa, u ko kolela wa pia ale, momo ka kolelele onduko ya Mõla a Suku ongunga.

¹⁹ Kuenje episo liaco lieli, ocinyi ceya voluali, puai lopo omanu va sole ca lua owelema, okuti ocinyi ci sule, momo ovilinga viavo vĩvi.

²⁰ Momo wosi o lingainga cĩvi o suvuka ocinyi, kuenje keya kocinyi, sanga ovilinga viaye vi situluka.

²¹ Puãi, u o linga ocili, iya kocinyi, oco ovilinga viaye vi molehe okuti via lingiwila vu Suku.

²² Eci a linga ovina evi, Yesu lolondonge viaye veya kofeka ya Yudea. Oko a kala kumue lavo kuenje haiko a papatisila.

²³ Yoano layevo wa kala loku papatisila vo ka Ainone, ocipepi la Salimi, momo oko kua kala ovava a lua, kuenje omanu veya yu va papatisiwa.

²⁴ Momo Yoano handi ka imbiwile vokayike.

²⁵ Peya oku lipatala ondaka yoku yelisua pokati kolondonge via Yoano la umue ukuavo u Yudea.

²⁶ Kuenje veya ku Yoano, yu va popia laye vati, A Rambei, una wa kala love kesinya lia Yordão, okuti ove muẽle wo wimbila uvangi, cilo yu, o papatisa, kuenje omanu vosi va kasi loku enda kokuaye.

²⁷ Yoano wa kumbulula hati, Omunu ka tambula cimue te eci ca wihiwa tunde kilu.

²⁸ Ene muẽle vulombangi viange okuti nda linga siti, Hameko Mesiya, puãi nda tumiwila oku pitila Mesiya kovaso.

²⁹ U o kasi londombua eye sandombua, haimo lumue, ekamba lia sandombua, una o tãilili oku u yevelela, layevo o yolela ca lua ondaka ya sandombua. Eyi oyo onjolela yange kuenje cilo ya suapo.

³⁰ Kaliye eye, caye oku amako, ame puãi, cange oku tepuluka.

³¹ U o tunda kilu wa piala vosi. U o tunda kilu lieve, ukuailu lieve, lovina viokilu lieve ovio a vangula. U o tunda kilu eye wa piala vosi.

³² Eci a mola leci a yeva oco a imbila uvangi, puãi lomue o tava kuvangi waye.

³³ U o tava kuvangi waye eye wa likuminya okuti Suku ukuacili.

³⁴ Momo u Suku a tuma o popia olondaka via Suku. Momo Suku ka eci Espiritu lonjongo.

³⁵ Isia o sole Mõla kuenje wa eca ovina viosi peka liaye.

³⁶ U o kolela Mõla o kuete omuenyo ko pui, puãi u ka kolela Mõla, eye ka moli omuenyo, puãi onyeño ya Suku yi kala ño-o laye.