YOANO 2 - Embimbiliya - Bíblia Sagrada em Umbundu

¹ Keteke liatatu kua kala uvala ko Kana ko vo Galilea, kuenje ina ya Yesu haiko a kala.

² Yesu wa lalekiwavo kuvala kuenda olondonge viaye.

³ Kuenje, eci ovinyu via pua, ina ya Yesu wa popia laye hati, Ka va kuete ovinyu.

⁴ Yesu wo kumbulula hati, Okãi, o kuete nye lame? Ekumbi liange ka lieyile handi.

⁵ Inaye wa popia lakuenje hati, Cosi a popia lene ci lingi.

⁶ Ocipepi kua kala asanga epandu ovawe, omu va kapa kapa ovava va Yudea va liyelisa lao ndociholo cavo. Asanga aco a kala okuti esanga lesanga lia soka ndolongoleta vivali, pamue vitatu.

⁷ Yesu wa popia lavo hati, Yukisi asanga ovava. Kuenje va a yukisa to.

⁸ Yu wa pañinya hati, Kaliye suiko tumue. Ka tu tuali ku muẽleakulia. Oco va a tuala.

⁹ Oco, eci muẽleakulia a maha ovava a linga ovinyu, kuenje ka kũlĩhile oko a tunda, akuenje va sua ovava puãi va ci kũlĩha, oco muẽleakulia wa pañinya sandombua.

¹⁰ Wa popia laye hati, Omanu vosi va tangola tete ovinyu viwa, kuenje noke, eci okuti va nyua ale, oco va tangola evi viaño. Ove puãi, wa soleka ovinyu viwa toke cilo.

¹¹ Ocilimbu eci, oco ocilimbu ca tete ca Yesu, ca lingiwila ko Kana ko vo Galilea. Ca lekisa ulamba waye, kuenje olondonge viaye vio kolela.

¹² Eci ovina evi via pita, eye wa lokila ko Kafarinau kumue la inaye la vamanjaye kuenda olondonge viaye, kuenje va kalako oloneke vimue.

¹³ O Pascoa ya va Yudea ya kala ocipepi, kuenje Yesu wa lamanela ko Yerusalãi.

¹⁴ Vonembele wa sangamo omanu va landisa olongombe lolomeme kuenda olopomba. Vakuakutolokaisa olombongo lavovo, haimo va kala.

¹⁵ Oco, oku iña osikote yolonjita, wa va tundisa vosi yavo vonembele, kumue lolomeme lolongombe. Wa pesela olombongo via vakuakutolokaisa, kuenje wa leñula olomesa viavo.

¹⁶ Oco wa popia lava va landisa olopomba hati, Ovina evi, tundi lavio. Onjo ya Tate ko ka yi lingisi ocitanda.

¹⁷ Olondonge viaye via ivaluka okuti ca sonehiwa citi, Ombili ñuetele onjo yove yi ndia.

¹⁸ Oco va Yudea vo wasa ondaka vati, Ocilimbu ce o tu lekisa omo o linga ovina evi?

¹⁹ Yesu wa va kumbulula, hati, Papululi onembele yilo, kuenje ndi yi katula koloneke vitatu.

²⁰ Oco va Yudea va popia vati, Onembele yilo ya kala loku tungiwa akui akuãla kanyamo kanyamo epandu, oco hẽ, ove o yi katula koloneke vitatu?

²¹ Puãi eye wa tukula onembele yetimba liaye.

²² Oco, eci a pinduiwa ku vakuavilangu, olondonge viaye via ivaluka okuti wa ci popia, kuenje va kolela ovisonehua lolondaka via tukula Yesu.

²³ Oco, eci a kala vo Yerusalai kofesta yo Pascoa, omanu va lua va kolela onduko yaye eci va mola ovilimbu a linga.

²⁴ Yesu puãi ka tavele oku likapa kokuavo,

²⁵ omo wa kũlĩha omanu vosi, kuenje ka sukilile okuti umue imbila omunu uvangi. Momo eye muẽle wa kũlĩha eci ci kasi vutima womunu.