YOANO 17 - Embimbiliya - Bíblia Sagrada em Umbundu

¹ Eci Yesu a popia ovina evi, wa petuila ovaso aye vilu, yu wa linga hati, A Tate, ekumbi lieya. Muisa Omõlove ulamba oco Omõla a ku muisevo ulamba.

² Momo wo wiha omoko yokomanu vosi, haiyo yoku eca omuenyo ko pui ku vosi wo wiha.

³ Omuenyo ko pui wowu, oku ku kũlĩha, ove lika vu Suku yocili, loku kũlĩhavo Yesu Kristu, u wa tuma.

⁴ Nda ku muisila ulamba kilu lieve, momo nda malusula upange wa nyihile oku u linga.

⁵ Kaliye, a Tate, muise ulamba kovaso ove. Muise ulamba una nda kaile lawo kumue love, osimbu oluali ka lua lulikiwile.

⁶ Nda situlula onduko yove komanu vana wopa voluali, yu wa va nyiha. Va kaile vove, kuenje wa va nyiha, yu va pokola kondaka yove.

⁷ Cilo va kũlĩha okuti ovina viosi wa nyiha via tunda kokuove.

⁸ Momo olondaka wa nyiha nda va vi iha kuenje va vi tava, yu va kũlĩha okuti ocili, nda tunda kokuove, kuenje va kolela okuti ove wa numa.

⁹ Ñasi loku va likutilila. Si kasi loku likutililila oluali, te ava wa nyiha, momo vove,

¹⁰ kuenje nda muisua lavo ulamba. Cosi cange cove, kuenje cosi cove cange.

¹¹ Ame si kasi vali voluali, ovo puãi, va kasi voluali, kuenje ame njiya kokuove. A Tate o kola, va lavela vonduko yove eyi wa nyiha, oco va kale vamuamue ndetu muẽle.

¹² Osimbu ame nda kala lavo, nda va lavela vonduko yove eyi wa nyiha. Nda va vetatela, kuenje pokati kavo lomue wa nyõlehapo te omõla enyõleho, oco ocisonehua ci lingiwe.

¹³ Puãi cilo njiya kokuove, kuenje ovina evi ndi vi popela voluali, okuti onjolela yange yi telisiwila vokuavo.

¹⁴ Nda va iha ondaka yove, kuenje oluali lua va suvuka, momo havakualualiko, ndeci ame siukualualiko.

¹⁵ Si pingi okuti o vopa voluali, te okuti o va teyuila kevĩho.

¹⁶ Ovo havakualualiko ndeci ame siukualualiko.

¹⁷ Va kolisila vocili cove, ondaka yove oyo ocili.

¹⁸ Ndeci ove wa numa ame voluali, haico ovo nda va tuma voluali.

¹⁹ Ndi va litumbikila oco ovo va kolisilue vocili.

²⁰ Si va likutilila ovo lika, puãi ndi likutililavo ava va laika oku ñolelela ondaka yavo,

²¹ okuti vosi va kala vamuamue, ndeci ove, a Tate, o kasi vokuange lame ñasi vokuove, okuti lavovo va kala vokuetu, oco oluali lu tave okuti ove wa numa.

²² Ulamba wa nyiha, ndo va iha, oco va kale vamuamue ndeci etu,

²³ okuti ame vokuavo, love vokuange, oco vosi va linge olumue vamuamue, oco oluali lu limbuke okuti ove wa numa, kuenje o va sole, ndeci o sole ame.

²⁴ A Tate, njongola okuti ava wa nyiha lavovo va kala oko ñasi, ha va moli ulamba wange wa nyiha locisola cove osimbu oluali ka lua sevetiwile.

²⁵ A Tate, okuesunga, oluali ka lua ku kũlĩhile, ame puãi, nda ku kũlĩha kuenje ava va kũlĩha okuti ove wa numa.

²⁶ Nda va lomboluila onduko yove kuenje lopo ndi va yi lomboluila, okuti ocisola wa sola laco ame, oco ci kale volonulo viavo, kuenje ame ñala volonulo viavo.