YOANO 16 - Embimbiliya - Bíblia Sagrada em Umbundu

¹ Nda popia lene ovina evi okuti ka vu konyuisua.

² Vo tundisi volosunangonga, kuenje, kuiya eteke okuti u o wipayi o soka hati, Nda vumba Suku.

³ Kuenje ovina evi va vi lingila omo ka va kũlĩhile Isia ndaño ame.

⁴ Puãi nda popia lene ovina evi, okuti eci ola yavo yiya, wivaluki okuti nda vi popele ale lene. Ovina evi sia vi vangowaile lene tunde kefetikilo omo nda kala lene.

⁵ Cilo puãi, ngenda ku-u wa numa, haimo lumue, pokati kene lomue o mula hati, Wenda pi?

⁶ Puãi, omo nda popia lene ovina evi, oco ovitima viene via nyumala.

⁷ Haimo lumue, ndu sapuili eci cocili cokuti, nda ngenda nda hise lene. Momo, nda si endi, Ñuatisi keya kokuene, puãi, nda ngenda, ndu tumisa kokuene.

⁸ Kuenje eye, eci eya, o pisila oluali ekandu kuenda o lu limbukisa esunga lekanga.

⁹ O pisila oluali ekandu, momo ka va ñolelele.

¹⁰ O lu limbukisa esunga momo ngenda ku Isia kuenje ka vu moli vali.

¹¹ O lu limbukisa ekanga momo ombiali yoluali lulo ya pisiwa.

¹² Lopo ñasi lovina via lua vioku popia lene, puãi ku vu tẽla handi oku vi yeva.

¹³ Eci Espiritu liocili eya, eye u songuili kocili cosi, momo ka popi lomoko yaye, puãi cosi a yeva oco a popia, kuenje u sapuili ovina vi lingiwa noke.

¹⁴ Eye o muisa ulamba, momo upa kuevi viange kuenje o vi sapula kokuene.

¹⁵ Cosi Isia a kuete cange, oco nda lingila siti, Upa kuevi viange kuenje o vi sapula kokuene.

¹⁶ Okasimbu kaño, kuenje ka vu moli, noke okasimbu kaño vali kuenje vu mola.

¹⁷ Olondonge vimue viaye via livangula, viti, Via lomboloka ndati ovina a popia ndeti letu, hati, Okasimbu kaño kuenje ka vu moli, noke okasimbu kaño vali, kuenje vu mola,— kuenda vali hati, Omo ngenda ku Isia?

¹⁸ Oco va lipula vali, vati, Eci a popia hati, Okasimbu, ca lomboloka ndati? Eci a ci popela ka tu ci.

¹⁹ Yesu wa limbuka okuti va yongola oku u pula, oco wa popia lavo hati, Ondaka yange eyi nda linga siti, Okasimbu kaño kuenje ka vu moli, noke okasimbu kaño vali kuenje vu mola, oyo vu kasi loku lipula pula elomboluilo liayo ale?

²⁰ Mopia lene siti, Ocili, ocili, ene vu lila loku litetela, oluali puãi lu yolela, vu sumua, puãi esumuo liene li pongoloka onjolela.

²¹ Ukãi, osimbu a kasi loku cita, o sumuila olungembia, momo ekumbi liaye lieya, puãi, eci a cita omõla, ka ivaluka vali olungembia luaco, omo o yolela okuti omunu wa citiwa voluali.

²² Oco cilo, ene wa sumui, puãi ndu moli vali, lovitima viene vi yolela, kuenje lomue u nyehi onjolela yene.

²³ Kuenje, keteke liaco, ko mula vali cimue. Mopia lene siti, Ocili, ocili, nda vu pinga cimue ku Isia, u cihili onduko yange.

²⁴ Toke cilo ka wa pingilili cimue vonduko yange. Pingi, kuenje vu ci tambula, oco onjolela yene yi suepo.

²⁵ Ovina evi nda vi popia lene lolosapo, kuiya puãi ekumbi eci si popi vali lene lolosapo, puãi ndu lomboluili ovina via Isia lolondaka vi yevala.

²⁶ Keteke liaco vu pingila vonduko yange, kuenje si popi lene siti, Ndu lombeliko ku Isia,

²⁷ momo Isia, eye muẽle, u sole omo ene wa soli ame, kuenje wa koleli okuti nda tunda ku Isia.

²⁸ Nda tunda ku Isia, kuenje ndeya voluali, cilo nunda voluali kuenje ngenda ku Isia.

²⁹ Olondonge viaye via linga viti, Ewa! Cilo o kasi loku popia eci ci yevala, halolusapoko.

³⁰ Cilo tu ci okuti wa kũlĩha ovina viosi, kuenje ka ci sukila vali oku ku pula pula. Oco ca tuiha ekolelo okuti wa tunda ku Suku.

³¹ Yesu wa va kumbulula hati, Cilo siti, Wa ci koleli?

³² Kuiya ekumbi, ocili lieya ale, okuti vu sanduilua, omunu koliaye, omunu koliaye, kuenje vu sia lika liange. Haimo lumue, si kasi lika liange, momo Isia o kasi kumue lame.

³³ Nda vangula lene ovina evi, oco vokuange vu kale lombembua. Voluali vu sakalaisua, puãi kolisiko, ame nda yula oluali.